Монголын электрон спортын холбооноос Монголд анх удаа 100 мянган ам.долларын шагналын сантай олон улсын Dota2-ын “MESA Invitational 2024” тэмцээнийг зохион байгуулах аж.
Тодруулбал, тус тэмцээн энэ сарын 14, 15-нд болох бөгөөд Ази, Европ, Монголын төлөөлөл найман баг Улаанбаатар хотын “Аса Арена” цогцолборт өрсөлдөх юм. Мөн уг тэмцээнд дэлхийн шилдэг Клемент “Puppey” Иванов тэргүүтэй “Team Secret”, Ануча “Jabz” Жиравон ахлагчтай “Aurora Gaming”, Карло “Kuku” Палад ахлагчтай “Talon Esports” болон шинэхэн байгуулагдсан “The MongolZ” баг оролцохоор мэдүүлэг өгсөн байна.
Түүнчлэн найман баг дөрвөөрөө хоёр хэсэгт хуваагдан тоглох ба хэсгийн тоглолтууд Bo2 журмаар болж, хэсэг тус бүрээс гурван баг хасагдах шатанд шалгарах бөгөөд хасагдах шатны тоглолтууд Bo3 журмаар болох юм. Тэгвэл Монголд анх удаа олон улсын багуудыг урьсан DOTA2-ын энэхүү тэмцээнд түрүүлсэн баг 50 мянган ам.доллар гардах бол мөнгөн медаль авсан баг 25 мянган ам.доллар, гурав, дөрөвдүгээр байрт шалгарсан баг 12500 ам.доллароор тус тус шагнуулах аж.
