ОХУ-ын ЭСЯ-ны цэргийн атташе, хошууч генерал П.В.Петрунин нь өнгөрсөн наймдугаар сарын 07-ны /2024.08.07/ өдрийн 20:20 цагийн орчимд архи согтууруулах ундааны зүйл хэрэглэсэн үедээ Баянзүрх дүүрэг Сансрын тойргийн орчимд ОХУ-ын Элчин сайдын яамны дугаар бүхий тээврийн хэрэгслийг жолоодон замын хөдөлгөөнд оролцож, зам тээврийн осол гаргаж, улмаар олон нийтийн газарт бие засах зэргээр зүй зохисгүй үйлдэл гаргасан ч түүнд ямар нэгэн хуулийн хариуцлага хүлээлгээгүй талаар бид өмнө нь мэдээлсэн билээ.
Тэгвэл Бүгд найрамдах Энэтхэг улсаас Монгол Улсад суугаа ЭСЯ-ны дипломат дугаартай автомашин зам тээврийн осол гаргаж, хэргийн газраас зугтсан хэрэг гарчээ.
Тодруулбал, энэ оны есдүгээр сарын 09-ний өдөр Бүгд найрамдах Энэтхэг улсаас Монгол Улсад суугаа ЭСЯ-ны 1505 ДК дугаартай дипломат автомашин зам тээврийн осол гаргаж, улмаар хэргийн газраас зугтаасан байна. Уг хэргийг өдгөө хуулийн байгууллагаас шалгаж байгаа аж.
ВИДЕО:
Сүүлийн үед манай улсад суугаа ЭСЯ-ны дипломат дугаартай машинууд авто осол их гаргаж байгаа нь манай улсын хуулийг үл тоож байгаагийн нэг хэлбэр юм. Гэсэн ч тэдгээр нь дархан эрх ямбаар далайлгаж, ямар нэгэн хуулийн хариуцлага хүлээхгүй байгаа нь олны дургүйцлийг төрүүлж байна. Тиймээс уг асуудалд холбогдох албаныхан энэ мэт асуудалд анхаарал хандуулах шаардлагатай байгаа юм.
