Америкийн бүжигчин А.Лиа: “Монгол хаан” жүжгийн үнэгний дүрд тоглохоор болсон минь нэр төрийн хэрэг /ВИДЕО/

Хөдөлмөрийн баатар, Төрийн шагналт, Ардын уран зохиолч Б.Лхагвасүрэн агсны зохиол “Тамгагүй төр” жүжгийг "Hero" энтертайментын найруулагч Б.Баатар шинэчлэн найруулж, "Монгол хаан" нэртэйгээр Английн Лондон хотын алдарт "West End" театрт өнгөрсөн оны арваннэгдүгээр сард 15 өдрийн турш тоглож, гадаадын 42 мянга гаруй үзэгчдийн хүртээл болгосон.

Улмаар Азидаа хөшгөө нээж, Сингапурт тоглогдох гэж буй. Иймд Сингапурын хэвлэлийнхэн болон, монгол иргэддээ зориулж, өнгөрсөн наймдугаар сарын 18-наас эхлэн УДЭТ-ын тайзнаа нийт тоглолоо. Ингээд нийт 180 удаа тоглогдсон “Монгол хаан” жүжиг өнөөдөр монгол дахь хаалтаа хийх гэж байна.

“Монгол хаан” жүжгийн хоёр дахь хувилбарт Рон Юань, Марк декаскос, Леонардо вү зэрэг холливүүдийн алдартай уран бүтээлчид дүр бүтээхээр болсон талаар бид өмнө нь мэдээлсэн. Тэгвэл энэ удаа бүжигчний дүрд буюу үнэгний дүрд АНУ-ын мэргэжлийн балетчин Лиа Апчерч тоглохоор болж, хэдийнээ жүжигтээ ороод эхэлжээ. Харих бид түүнтэй тоглолтынх нь дундуур цөөн хором ярилцлаа.

ВИДЕО:

-Монголд анх удаагаа ирж байна уу?

-Сайн байцгаана уу. Намайг Лиа гэдэг. Би АНУ-аас ирсэн. Одоо “Монгол хаан” жүжгийн үнэгний дүрд тоглож байгаа. Би монгол улсад хоёр дахь удаагаа ирж байна. Жилийн өмнө нэгдүгээр сард бас ирж байсан юм. Тухайн үед өвөл болж учраас үнэхээр хүйтэн байсан. Тэр үед Монголд ирээд хөдөө явахад их үзэсгэлэнтэй санагдсан. Хүмүүс нь ч гэсэн үнэхээр гоё хувцасладаг юм байна. Монголчуудын биеэ авч яваа байдал нь ч бусад улсын иргэдээс өөр нэг тийм эрхэмсэг санагдсан.

-“Монгол хаан” жүжгийн талаар анх хаанаас сонсож мэдэв. Энэ жүжигт оролцох саналыг хэн тавьсан бэ?

-Миний хувьд “монгол хаан” жүжгийн талаар хоёр долоо хоногийн өмнө л мэдсэн.

Найз залуу маань Монголд байдаг учраас өмнө нь Монголд ирж монгол хаан жүжгийг үзэж байсан юм. Манай найз залуу хэлэхдээ, “Лиа нэг ийм жүжиг байна. Чи шалгаруулалтанд орох уу” гэсэн. Би ч зөшөөрч,  “Монгол хаан” жүжгийн бүжигчдийн сонгон шалгаруулалтанд орж тэнцээд, бэлтгэлээ хийж, анхныхаа тоголтуудад оролцоод явж байна даа.

-Одоо хаана ямар ажил хийдэг вэ? Манай Монгол уншигчдад өөрийнхөө талаар товч танилцуулахгүй юу?

-Би гурван настайгаасаа хойш балетаар хичээллэж байгаа. Америкийн хэд хэдэн томоохон балетын компанид өмнө нь ажиллаж байсан. Гэхдээ зөвхөн балетаар бус жааз, тап, контемперари, моран бүжгүүд бүжиглэдэг. Хамгийн анх Чикагод байдаг “Жофре” балетын компанид бүжигчний гараагаа эхлүүлж байлаа. Тэндээ одоо ч заримдаа бүжгийн багш хийдэг.

Ер нь л багаасаа балетаар хичээллэж одоог хүртэл бүжгээ бүжиглээд явж байгаа хүн байна.

-Монгол бүжиг өөрийн чинь байнга бүжиглэдэг бүжгүүдээс мэдээж ялгаатай шүү дээ? Юу нь өөр, илүү онцлогтой санагдав?

-Монгол бүжгийн бусад орны бүжгүүдээс ялгарах нэг ялгаа нь цээж болон мөрөө илүү хөдөлгөдөг, мөн гарын бугалга хэсгийн хөдөлгөөн ихтэй юм байна. Тэр нь миний хувьд үнэхээр шинэлэг санагдаж байгаа. Олон жил сурсан зүйлээ өөрчилж, монгол бүжиг хийж байгаа нь үэнэхээр сонирхолтой байгаа. Гэхдээ ижилхэн бүжгийн л урлаг учраас төстэй зүйл олон байсан.

-Дүрдээ хэрхэн орж, хэрхэн төсөөлж байна?

-Монгол хаан жүжгийн баг хамт олонтой байхад надад үнэхээр таалагдаж байгаа. Хүн болгон л найрсагаар ханддаг. Хааяа хэлний бэрхшээл гарч байгаа ч гэсэн багийнхаа нэг хэсэг нь юм шиг дотночилж байгаад үнэхээр баяртай байна. Харин одоо тоглолт болгоны дараа би өөртөө улам л итгэлтэй болж, үнэгний дүрдээ сайн хувирч байгаагаа мэдэрч байна.

Үнэг гэдэг нь монголын өвөг дээдсийн уламжлалтай салшгүй холбоотой тэнгэрлэг хэрнээ эрхэмсэг дүр гэж харж байгаа.

Мөн “Монгол хаан” жүжигт энэхүү үнэгний дүр нь хоёр ханхүүгийн хувь таиланг үзэгчдэд заан чиглүүлж байгаа дүр учраас дотоод ертөнцийг нь илүү харуулж, тоглохыг хичээж байна даа .

-Цаашдаа Монголд хэр удах вэ? Монгол Улс хэр таалагдаж байна?

-Миний хувьд өдөр ирэх тусам л монгол улсад хайртай болж байгаа учраас цаашид ч илүү удаан баймаар санагдаж байна. Мөн би монголд бүжгийн салбарт өөр хүмүүстэй ч бас хамтарч ажиллаж үзмээр байна. Өөр шинэ боломж гарвал өөрийгөө сорьж үзэхэд бэлэн байгаа. Мөн монголд дэлгүүр хэсэж үзмээр байна. Эндээс явахдаа заавал нэг юм уу, хоёр монгол үндэсний эд зүйл авч явна аа.

-Ярилцсанд баярлалаа.