Үндсэн хуулийн Цэцийн гишүүн болох Н.Чинбат, Д.Одбаяр нарын бүрэн эрхийн хугацаа дуусгавар болоод жил гаруй хугацаа өнгөрч байгаа ч дараагийн нэр дэвшигчид тодролгүй өнөөдрийг хүргэсэн.
Н.Чинбатын орны гишүүний сонгон шалгаруулалтыг Улсын дээд шүүх хэд, хэдэн удаа зарласан нь ч тэнцэх хүн олдохгүй, эцэст нь сонгон шалгаруулалтад МУИС-ийн Хууль зүйн сургуулийн багш О.Мөнхсайхан тэнцсэн юм. О.Мөнхсайханыг Улсын дээд шүүхийн шүүгчдийн олонхын санал авч, дэмжигдсэн учраас түүнийг Цэцийн гишүүнээр томилох саналаа УИХ-д хүргүүлсэн.
Харин Д.Одбаярын оронд УИХ-ын ерөнхий нарийн бичгийн дарга Л.Өлзийсайханыг томилуулахаар нэр дэвшүүлжээ. Д.Одбаярыг УИХ-аас томилсон учраас түүний дараагийн хүнийг ч УИХ-аас санал болгосон нь энэ аж. Өөрөөр хэлбэл, УИХ-ын дарга Г.Занданшатар өөрийн хүнээ санал болгосон байна. Тэгвэл Л.Өлзийсайханыг Үндсэн хуулийн цэцийн гишүүнээр томилох саналыг өнөөдөр /2023.11.15/ Төрийн байгуулалтын байнгын хорооны хуралдаанаар хэлэлцээд 72.7 хувийн саналаар дэмжлээ.
