“Turquoise Hill Resources”-ийн ТУЗ “Rio Tinto”-гийн тавьсан саналтай холбоотойгоор Тусгай хороо байгуулснаа мэдээллээ.
“Rio Tinto” компани гуравдугаар сард “Turquoise Hill Resources”-ийн 49.2 хувьд ногдох хувьцааг 2.7 тэрбум ам.доллароор худалдан авах санал тавьсан юм. Тус компани нэгж хувьцааг 34 канад доллароор үнэлж, компанийг 100 хувь эзэмшсэнээр төслийн засаглал, менежментийн систем илүү энгийн болно гэж үзэж байгаа аж.
Энэхүү саналыг хэлэлцэхээр “Turquoise Hill Resources”-ийн хараат бус дөрвөн гишүүнээс бүрдсэн Тусгай хороо байгуулагдсан байна.
Тусгай хороо “Rio Tinto”-ийн тавьсан саналыг хүлээж авах эсвэл хариу санал гаргах зэрэг асуудлыг хэлэлцэн шийдвэрлэх юм. Ингэхдээ “BMO Capital Markets” компани санхүүгийн зөвлөхөөр, компанийн энгийн хувьцааны үнэлгээ тогтооход “TD Securities” компанитай хамтран ажиллахаар болжээ.
