О.Батбаяр: Дельта болон Омикроны хувилбараар зэрэг халдварлаж өвдөх тохиолдлууд бүртгэгдэж байна

О.Батбаяр: Дельта болон Омикроны хувилбараар зэрэг халдварлаж өвдөх тохиолдлууд бүртгэгдэж байна

ЭМЯ-ны ээлжит хэвлэлийн хурал боллоо. Энэ үеэр Коронавируст халдварын омикрон хувилбарын талаар /2021.12.17/ мэдээлэл хийлээ.

УОК-ын эрдэмтдийн зөвлөлийн нарийн бичгийн дарга О.Батбаяр: "ДЭМБ-ийн зүгээс 2021 арванхоёрдугаар сарын 14-ны өдөр мэдээлэл хийсэн бөгөөд Омикрон хувилбар өнөөдрийн байдлаар 86 оронд бүртгэгдээд байна. Омикрон хувилбарын халдварлах түвшин урьд өмнө гарч байсан коронавирусын хувилбаруудаас хамгийн өндөр байгааг ДЭМБ-аас онцолсон. ДЭМБ-ын зүгээс улс орнуудад эрүүл мэндийн салбарын бэлтгэлээ хангахыг уриалсан бөгөөд нэг жилийн өмнөхтэй харьцуулахад улс орнуудын эрүүл мэндийн салбар суларсан байгаа нь байдлыг хүндрүүлж байгааг анхаарууллаа. ДЭМБ-ын зүгээс вакцины нэмэлт тунг эсэргүүцэхгүй байгаагаа албан ёсоор мэдэгдсэн

Манай улсын хувьд омикронд өртсөн улс орнууд дахь омикронтой холбоотой тохиолдлын тоо хамгаалах чадвар халдвар ба хүндрэл, нас баралтыг хүйс болон насны бүлгээр нөлөө вакцины үр нөлөө эмчилгээ оношилгооны өөрчлөлт, давтан өвчлөлийг анхааралтай ажиглаж байна.

Их Британи улсад Омикрон хувилбарын анхны нас баралт бүртгэгдсэн бөгөөд тохиолдлын тоо 1.5 өдөрт хоёр дахин нэмэгдэж байгааг мэдээллээ. Тус улсын эрүүл мэндийн салбар энэ ачааллыг даахгүй гэдгээ мэдэгдсэн бөгөөд салбарын маш олон хүн өвчилсөн байгаа юм байна. 1-2 сарын дараа дэлхийн олон орон Дельта болон Омикроны зэрэгцсэн давлагаанд өртөх эрсдэлтэй байгаа. Хоёр хувилбараар зэрэг халдварлаж өвдөх тохиолдлууд бүртгэгдэж байна.

Омикрон хувилбар уушгины эд эсэд нэвтрэхээс өмнө амьсгалын дээд замын салстын эсэд нэвтэрч, олшрон үрэвсэл үүсгэж байгаа талаар судалгаа гарсан бөгөөд шинж тэмдэг нь амьсгалын дээд замтай холбоотойгоор илэрч байгаа. Тодруулбал, нус гоожих, найтаалгах, ханиах, хоолой өвдөх, цагаан мөгөөрсөн хоолой үрэвсэх, ядрах, толгой өвдөх шинж тэмдэг давамгайлж байна. Танд томуу төстэй дээрх шинж тэмдэг илэрч байвал томуу гэхээс илүүтэй Омикрон хувилбар байж болзошгүй гэдэг сэрэмжлүүлгийг Омикрон хувилбар дэгдсэн улс орнууд иргэддээ мэдээлж байгаа. Омикрон хувилбарын нууц хугацаа богиноссон тул зул сарын хүлээн авалтыг гэр бүлээс өргөн хүрээнд тэмдэглэхийг хориглож эхэлсэн.

Манай улсын хувьд Омикрон хувилбарын хүчтэй давлагаанд өртөхгүй байхын тулд хил дээрх хяналтыг сайжруулахад голлон анхаарч байгаа. Одоохондоо дотоодод халдвар бүртгэгдээгүй байгаа бөгөөд үргэлжлүүлэн хилийн хяналтаа сайн тавина. Тиймээс иргэдээ аль болох гадаад улс руу явахгүй байхыг уриалж байна. Онцын шаардлагагүй бол гэр бүл, улс орноо эрсдэлд оруулахаас сэргийлээрэй" гэлээ.