УИХ дахь АН-ын бүлгийн өнөөдрийн ээлжит хуралдаанаар хоёр асуудал хэлэлцсэн байна.
Тус бүлгийн хуралдаанд Эрчим хүчний сайд Н.Тавинбэх цахилгаан, эрчим хүчний өнөөгийн байдлын талаар мэдээлэл өгсөн. Бүлгийн гишүүд Н.Тавинбэх сайдыг салбараа мэддэг, мэргэжлийн сайд хэмээн үнэлж байгаа ч ажиллах арга барилаа өөрчлөх шаардлагатай байгааг хэлж байна. Учир нь энэ салбар маш хүнд байдалд орж, их хэмжээний өр төлбөрт орсон ч хөрөнгө оруулалт татаагүй, улсын төсвөөс олигтой мөнгө хуваарилаагүй. Тиймээс салбарын сайдыг лобби хийж, зоригтой ажиллах шаардлагатай байгааг АН-ын бүлгийн гишүүд хэлж байна.
АН-ын бүлгийн дарга Д.Ганбат: Эрчим хүчний салбар эрсдэлтэй, хүнд нөхцөл байдалд орсон байна. Эх үүсвэрийнхээ хүчин чадлыг 100 хувь ашиглан ажиллаж байна. Эрчим хүчний хэрэглээ жилд 8-10 хувиар нэмэгддэг. Энэ салбарт 16 000 хүн ажиллаж байна. Тэдний дундаж цалин 1.6 сая төгрөг байдаг.
Монголын эрчим хүчний асуудлыг шийдэх томоохон төсөл болох Эгийн голын УЦС-ын ТЭЗҮ бэлэн. Энэ УЦС ашиглалтад орвол манай эрчим хүчний салбарын хүчин чадал 300 мВт-аар нэмэгдэх боломжтой. Гэвч ОХУ-аас энэ УЦС нь Байгаль нуурт сөрөг нөлөөтэй хэмээн эсэргүүцсээр байгаа.
АН-ын бүлгээс эрчим хүчний салбарын хүндрэлд иргэдийг буруутгаж болохгүй сануулсан байна. Учир нь манай улсын иргэдийн эрчим хүчний хэрэглээ маш бага. Иргэдийн ихэнх нь гэр хороололд гэрт амьдардаг бөгөөд орон сууцныхан 100 мкв-аас бага хэмжээтэй байранд амьдардаг. Тиймээс ажлаа сайн хийхийг Эрчим хүчний сайдад сануулсан. Энэ Засгийн газар мэргэжлийн хэдхэн сайд байгаа. Тэдний нэг нь Эрчим хүчний сайд Н.Тавинбэх.
УИХ-ын гишүүн С.Одонтуяа: Эрчим хүчний сайд лобби хийхдээ муу байна, зориггүй байна. Улсын төсөвт мөнгө байгаа. Хэдэн тэрбумаар нь хөшөө, музейнд зарж байна. Гэтэл яагаад доголдсон эрчим хүчний салбартаа олигтой хөрөнгө хуваарилахгүй байна вэ. Үүнийг сөрөг хүчинтэй хамтарч хийх хэрэгтэй.
