Шинэ төрлийн коронавирусээр халдварласныг илтгэж болох хөнгөн зэргийн дөрвөн шинж тэмдгийг дэлхийн эмч нарын судалгаанаас түүвэрлэн авч Их Британийн “Daily Express” сонин нийтэлжээ.
- Эхнийх нь дотор муухайрах, бөөлжих, гүйлгэх, хоолны дуршил буурах. Хөнгөн хэлбэрээр өвчилсөн тохиолдолд эдгээр шинж тэмдэг илэрч болох ч нөгөө талаар энэ нь ходоод гэдэсний өвчний шинж тэмдэг ч байж болох юм. Тиймээс энэ шинж тэмдэг илэрвэл шууд коронавирусийн халдвар авсан гэж ойлгож болохгүй гэдгийг эмч нар хэлжээ.
- Хоёрдахь шинж тэмдэг нь нүдний салст бүрхэвчийн үрэвсэл. Америкийн Нүдний эмгэг судлалын академийн судлаачийн онцлон тэмдэглэснээр, энэ шинж тэмдэг нь шинэ коронавирусийн халдвар авсан нь батлагдсан хүмүүсийн 1-3 хувьд нь тохиолдож байгаа аж.
- Гуравдахь шинж тэмдэг нь ой тогтоолт, оюуны чадавх буурч илэрдэг танин мэдэхүйн эмгэг аж. Гэхдээ халдвар авсан цөөн хэдэн хүнд энэ шинж тэмдэг илэрч буйг онцолжээ.
- Халдварын эрт үед илрэх дөрөв дэх шинж тэмдгээр эмч нар ядаргааг нэрлэжээ. Учир нь “COVID-19”-ийн шинжилгээний хариу нь эерэг гарсан өвчтөнүүдийн тал хувьд нь энэ шинж тэмдэг нийтлэг илэрчээ.
Эх сурвалж: TASS