"Нүүрсний" гэх тодотголтой хэргээр хорих ял шийтгэгдсэн УИХ-ын гишүүн асан Т.Аюурсайхан, "Эрдэнэс Тавантолгой" ХК-ийн Гүйцэтгэх захирал асан Б.Ганхуяг нар хорих байгууллагад "Номын санч", "Талбайн туслах"-аар ажиллаж байгаа талаар бид өмнө нь мэдээлсэн билээ.
Тодруулбал, шүүхээс 2.6 жилийн хорих ял шийтгэгдсэн УИХ-ын гишүүн асан Т.Аюурсайхан нь "Насанд хүрээгүйчүүдийн хорих анги" буюу ШШЕГ-ын "Сургалт хүмүүжлийн тусгай байгууллага"-д номын санч хийж байгаа бол 3.9 жилийн хорих ял сонссон "Эрдэнэс Тавантолгой" ХК-ийн Гүйцэтгэх захирал асан Б.Ганхуяг нь Хорих 405 дугаар анги болох Тахир соёотод талбайн туслахаар ажиллаж, хорих ялаа эдэлж байгаа.
Тэгвэл УИХ-ын гишүүн асан Т.Аюурсайхан тун удахгүй суллагдана гэх мэдээлэл байна.
Тодотговол, Чингэлтэй дүүргийн Эрүүгийн хэргийн анхан шатны шүүхийн 2024 оны нэгдүгээр сарын 31-ний өдрийн 94 дүгээр шийтгэх тогтоолоор Т.Аюурсайханд 3 жилийн хорих ял, Нийслэлийн Эрүүгийн хэргийн давж заалдах шатны шүүхийн 2024 оны есдүгээр сарын 12-ны өдрийн 1053 дугаар магадлалаар түүнд оноосон 3 жилийн хорих ялыг 2.6 жилийн хорих ял болгон өөрчилсөн байдаг. Өөрөөр хэлбэл, 2024 оны нэгдүгээр сарын 31-ний өдөр ял шийтгэгдэн хоригдож эхэлсэн бөгөөд хоёр жил орчим хорих ялаа эдэлсэн байна. Эх сурвалжийн мэдээлж буйгаар Т.Аюурсайхан нь сар шинийн баярын үеэр суллагдаж магадгүй гэх мэдээлэл байгаа юм.
