Сүүлийн үед иргэд Дархан цаазад Богдхан уулнаас хууль бусаар тарвага агнах тохиолдол цөөнгүй гарах болсон. Тухайлбал, энэ сарын 04-ний /2025.08.04/ өдөр Тоёота ланд 200 маркийн машинтай иргэн Богдхан уулын Жаргалантын аманд тарвага буудаж алаад зугтсан хэрэг гарсан. Улмаар тухайн этгээдийг цагдаагийн байгууллага олж илрүүлэн мөрдөн шалгах ажиллагааг явуулж эхлээд байгаа.
Тэгвэл энэ мэтээр Дархан цаазат Богдхан уулнаас тарвага агнах, агнахыг оролдох тохиолдол нэмэгдэх болсон байна. Тиймээс бид Богдхан уулын байгаль хамгаалагч Э.Олзвойг эргүүл, шалгалт хийхэд нь хамт явж, нөхцөл байдал ямар байдгийг сурвалжиллаа.
ВИДЕО:
Богдхан уулын ам бүрийг байгаль хамгаалагчид хамгаалдаг аж. Харин сүүлийн үед хууль бусаар тарвага агнах явдал ихээр гарч байгаатай холбоотойгоор Богдхан уулын Дархан цаазад газрын хамгаалалтын захиргааны дарга Э.Цогбадрал үүрэг чиглэл өгч, байгаль хамгаалагчид өдөр бүр эргүүл, шалгалт хийж эхэлжээ.
Байгаль хамгаалагч Э.Олзвойгийн хэлж буйгаар байгаль хамгаалагчдын ажиллах нөхцөл, техник, хувцас хэрэгсэл сүүлийн жилүүдэд нэлээд сайжирсан нь тэдэнд хариуцсан ажлаа хийх урам зориг, эрч хүч өгчээ. Харин иргэдийн ухамсаргүй, хариуцлагагүй үйлдлээс шалтгаалан Дархан цаазат Богдхан ууланд хэрэг, зөрчил ч багагүй гарч, хүндрэл үүсгэх болсон гэдгийг тэрбээр нуусангүй. Тухайлбал, амарч зугаалж байгаа иргэд гал алдах, самар жимс түүх, ан амьтан агнах зэрэг зөрчил нэлээдгүй гарах болсон гэдгийг хуучилсаар бид Богдхан уулын ... амны уулын бэлд ирэв.
Байгаль хамгаалагч Э.Олзвой тус газрыг гарын таван хуруу шигээ мэддэг аж. "Энд нэг дош бий. Эрсдэлтэй. Үүнийг нэг шалгая" гэсээр машинаас бууж, тарваганы дошийг шалгавал тэнд мод, төмрөөр хийсэн урхи тавьжээ. Харин ойролцоох бүх нүхнүүдийг том чулуу, шороогоор булж бөглөсөн харагдав. Энэ талаар байгаль хамгаалагч Э.Олзвой "Бид өдөр бүр тарваганы дошнуудаа шалгадаг ч зарим ухамсаргүй иргэд ингээд урхи тавиад байдаг юм. Долдугаар сараас хойш гэхэд 40 орчим урхи хурааж авсан. Нэг удаа эргүүлээр явж байгаад урхинд орсон тарвагыг олж, урхинаас нь салгаж тавьсан. Хэрэв яг тэр байдлаараа удвал тарвага халуурч, улмаар тахал гарах эрсдэл маш өндөр. Богд уул суурьшлын бүстэй ойрхон учир хэрэв тахал гарвал аюул болно шүү дээ. Иргэд үүнийг ойлгож, ухамсарлахгүй ганцхан тарвага юм чинь гэдэг байдлаар хандаж, эцэстээ өөрсдөө гэмт хэрэгтэн болцгоож, өндөр хэмжээний торгууль төлдөг" гэдгийг тодотгов.
Ингээд бид цааш явж тарваганы хэд хэдэн дош шалгахад мөн л урхи тавьж, нүхнүүдийг нь бөглөсөн байхтай таарч, байгаль хамгаалагч зөрчлийг арилгасан юм. Богдхан уул Дархан цаазтай уул учир тус ууланд ан амьтан агнах, жимс, самар түүхийг хуулиар хориглодог. Тиймээс иргэдийг энэ бүхнийг ухамсарлаж, байгаль дэлхийгээ хайрлан хамгаалж, иргэний үүргээ биелүүлэхийг уриалж энэхүү сурвалжилгыг бэлтгэлээ.