Тусгай хамгаалалттай газар нутгийн тухай хуульд "Дархан цаазат газар, түүний хамгаалалтын бүсэд аялал жуулчлалаас өөр зориулалтаар үйл ажиллагаа явуулж, байшин барилга барихыг хориглоно" гэж заасан. Гэтэл сүүлийн хэдхэн жилийн дотор Дархан цаазат Богдхан ууланд хөл гишгэх зайгүй газар олгож, өндөр барилга байгууламж, хувийн хаусуус сүндэрлэх болсон. Уг хууль зөрчсөн үйлдлийг хэвлэл мэдээллийнхэн хийгээд ард иргэд шүүмжилж, мэдээлдэг ч энэ нь энгийн үзэгдэл мэт болоод буй.
Гэтэл Дархан цаазат Богдхан ууланд хууль зөрчиж газар олгосон уг асуудлын хор уршиг өдгөө зэрлэг ан амьтадад сөргөөр нөлөөлөх болжээ. Ийн өгүүлэхийн учир нь Богд ууланд газар эзэмшиж буй иргэд, аж ахуйн нэгжүүдийн өмчөө хамгаалах нэрийдлээр барьсан стандарт бус хашаанд зэрлэг ан амьтад сүлбүүлж үхэх, шархдах тохиолдол ихээр гарах болсон байна. Тиймээс бид уг асуудлыг хөндөж дараах сурвалжилгыг бэлтгэлээ.
ВИДЕО:
-"ЖАРГАЛАНТ"-ЫН АМАНД БАЙРЛАХ АЙЛЫН ХАШААНД БУГА СҮЛБҮҮЛЖ ҮХСЭН ТОХИОЛДОЛ БҮРТГЭГДЖЭЭ-
Дархан цаазад Богдхан уулын ам бүр нь "Эзэн"-тэй болж, хөл гишгэх зайгүй төмөр хашаа татаж, барилга байгууламж барьжээ. Гэтэл тэндээс хэдхэн киллометрийн зайнд олон төрлийн ховор болон нэн ховор зэрлэг ан амьтан амьдардаг бөгөөд амьтад ган, зуд, байгалийн гамшиг, зэрлэг нохдын нөлөөгөөр суурьшлын бүсэд орж ирэх тохиолдол цөөнгүй гардаг аж.
Нөгөөтээгүүр, Богд уулын хормойгоор урсах Туул голоос ундаалахаар төв суурин руу орж ирэх нь элбэг болсон байна. Гэвч иргэд, аж ахуйн нэгжүүдийн өмчөө хамгаалахаар барьсан хурц үзүүртэй, өндөр, стандарт бус хашаанаас үүдэж, амьтанд тэдгээр саадыг давахын тулд бэртэж гэмтэх, цаашлаад сүлбүүлж амь нас нь эрсдэх зэрэг тохиолдол ихээр гарах болсон аж. Хамгийн сүүлд гэхэд энэ хавар "Жаргалант"-ын аманд байрлах айлын төмөр хашаанд буга сүлбэгдэж, дотор гэдэс нь хүүлэгдэж гарсан байдалтай үхсэн байсныг байгаль хамгаалагчид илрүүлсэн байна. Мөн бор гөрөөс төмөр хашаанд толгойгоороо орж, гацсан байдалтай байсныг байгаль хамгаалагчид гаргаж, яаралтай арга хэмжээ авч амь насыг нь авран хамгаалжээ. Энэ талаар Дархан цаазад Богдхан уулын хамгаалалтын захиргааны байгаль хамгаалагч С.Батбаатар мэдээлсэн бөгөөд тэрбээр "Улаанбаатар хот тэлээд Богд уул руугаа суурьшлын бүс бий болгосонтой холбоотойгоор орц, гарц нь хязгаарлагдаж, ан амьтдын бэлчээр болон ундны усанд нь сөрөг нөлөө үзүүлэх болсон. Энэ жил бороо хур бага орж, гантай байгаатай холбоотойгоор булаг, шанд ихээр ширгэсэн. Тиймээс ч ан амьтад ус бараадаж, суурьшлын бүс рүү ихээр орж ирж байна. Ингэхдээ хүний буруутай үйл ажиллагаанаас болж тоо толгой нь хорогдох явдал ч гарах боллоо" гэсэн юм.
-СТАНДАРТ ХАШААТАЙ БОЛООГҮЙ ИРГЭД, АЖ АХУЙН НЭГЖИД ХАРИУЦЛАГА ТООЦНО-
Богдхан уулын Дархан цаазад газрын хамгаалалтын захиргаанаас "Богдхан ууланд барьсан стандартын бус хашааг албадан буулгах" ажлыг зохион байгуулахаар болж, тухайн суурьшлын бүсэд буй аж ахуйн нэгж, албан байгууллагуудад мэдэгдэл, зөвлөмж хүргүүлэн ажиллаж байгаа аж.
Тус зөвлөмжид "Стандарт бус, шовх үзүүртэй хашааны улмаас зэрлэг амьтад гэдсээ хүүлүүлж үхэх болон бэртэж гэмтэж байгаа тул иргэн, хуулийн этгээдүүд нь 2025 оны 01 дүгээр сарын 27-ны өдрийн 25/05 дугаартай Нийслэлийн иргэдийн төлөөлөгчдийн хурлын тогтоолоор батлагдсан UCS0304B:2025 стандартын хэрэгжилтийг хангах 1.3-д “Улсын тусгай хамгаалалттай газар нутгийн зэрлэг амьтдад ээлтэй хашаанд тавих ерөнхий шаардлагад нийцүүлж хашаагаа солих,
Нийтээр дагаж мөрдөхөөр батлагдсан UCS0304B:2025 стандартын хэрэгжилтийг хангах тус тус арга хэмжээг 2025 оны 10 дугаар 01-ний өдрийн дотор хийж гүйцэтгэж тайланг Хамгаалалтын захиргаанд ирүүлэх, дээрх заагдсан хугацаанд хэрэгжүүлээгүй тохиолдолд зөвлөмжийн биелэлтийг хангах ажлын хүрээнд холбогдох эрх бүхий байгууллагуудтай хамтран хатуу арга хэмжээ авахыг мэдэгдэж байна" гэжээ.
