Дорнод аймгийн Матад сумын Эрдэнэбадрах 6 дугаар багийн “Лагийн хоолой” гэх газарт аянга буусны улмаас хээрийн түймэр гарчээ. Тус түймрийн дуудлагыг наймдугаар сарын 4-ний 15:15 цагт хүлээн авсан байна.
“Лагийн хоолой” нь аймгийн төвөөс зүүн урд зүгт 290 км, сумын төвөөс зүүн урд зүгт 90 км-ийн зайд оршдог. Гал түймрийг Сүхбаатар аймгийн Онцгой байдлын газрын 47 дугаар ангийн алба хаагчид, Матад сумын Мэргэжлийн ангийнхан болон газрын тосны “Петро Чайна Дачин Тамсаг” ХХК-ийн 19 дүгээр талбайн ажилтнууд хамтран ажиллаж унтраасан байна. Түймрийг наймдугаар сарын 5-ны 07:00 цагт цурамд оруулж, 10:20 цагт бүрэн унтраажээ. Уг хээрийн түймэрт нийт 30 мянган га талбай өртөж, шатсан байна.
