“Ардын намын дарга УИХ-ын толгой дээр гарч суугаад даргалахгүй” гэсэн УИХ дахь Ардчилсан намын бүлгийн шаардлага Ерөнхий сайд Г.Занданшатарыг өөрийн хүсэлтээр чөлөөлөгдөж, улмаар Н.Учралыг Ерөнхий сайд болоход хүргэлээ.
АН-ын бүлгийн уг шаардлага холын улс төрөө бодоогүй, харин дотоод сонгуулийнхаа үеэр намын гишүүддээ “парламентад бяртай” гэдгээ харуулах гэсэн байж магадгүй байгаа. Учир нь УИХ дахь АН-ын бүлгийн гишүүд өдөр бүр л “хэзээ хуралдаа суух вэ” гэж О.Цогтгэрэл даргаасаа асууж, “ирэх долоо хоногт хуралдаа сууя” гэж дор бүрдээ төлөвлөж байсан юм билээ. Ирэх Даваа гараг /2026.03.30/ хүртэл Г.Занданшатар хүлээсэн бол УИХ дахь АН-ын бүлэг хуралдаад “татвар, шатахуун зэрэг чухал асуудлыг хэлэлцэх үеэр УИХ-ын чуулганы хуралдаа сууна” гэсэн шийдвэрийг гаргах байсан ч байж магадгүй.
Нөгөөтэй Ардын намын дарга Н.Учралаас өөр Ж.Бат-Эрдэнэ, Б.Пүрэвдорж гэсэн УИХ-ын дэд дарга нар “гал намжих” хүртэл УИХ-ын чуулганы хурлаа удирдаад явах боломж ч байсан. Гэтэл Ж.Бат-Эрдэнэ, Б.Пүрэвдорж нарын хэнээр нь ч УИХ-ын чуулганыг Н.Учрал удирдуулсангүй.
-Д.АМАРБАЯСГАЛАНД АН АШИГЛАГДАВ-
Өөрөө парламентад 68 гишүүнтэй, найман гишүүнтэй ХҮН, дөрвөн гишүүнтэй ИЗНН-тай засгийн газартаа хамтарсан МАН-ыг УИХ-д 80 суудалтай гэж тоолох нь зүйн хэрэг. Энгийн олонх буюу 64 гишүүнээр ирц нь бүрдээд хуралдах ёстой УИХ-ын чуулганы хуралдаан АН-ын бүлгийн 42 гишүүдээр дутахгүй гэсэн үг. Гэтэл УИХ-ын чуулганы ирц хүрэхгүй, хуралдаж чадахгүй байгаад “АН-ын бүлэг буруутай” хэмээн сүүлийн 14 хоног хэвлэлд ярьсан МАН-ын бүлгийн гишүүд өчигдөр /2026.03.27/ Ерөнхий сайд Г.Занданшатарын чөлөөлөгдөх хүсэлтийг хэлэлцэх болохоор бүгд хуралдаа сууж, ирцээ бүрдгүүлчхэж байна.
Учир нь АН-ын бүлгийн шаардлагад “МАН-ын дарга Н.Учрал УИХ-ын чуулганыг битгий удирдаад бай” гэсэн болохоос “Ерөнхий сайд Г.Занданшатар огцор” гээгүй. Энэ утгаараа Ерөнхий сайд Г.Занданшатарыг АН биш МАН өөрөө огцруулчхаж байгаа юм.
Харин АН-ын бүлгийн гишүүдийн хуралдаа суухгүй байгааг ашиглан Д.Амарбаясгалан болон Л.Оюун-Эрдэнэ хоёрын 21 гишүүн УИХ-ын чуулганы хуралдаа орохгүй байсан нь ирц бүрдэхгүй байх гол шалтгаан болсон.
Иймээс МАН-ын удирдлагууд Д.Амарбаясгалантай тохирч, “түүний хүрээллээс Засгийн газарт хоёроос дөрвөн сайд томилох эсвэл түүний талын хүнийг УИХ-ын даргаар сонгох” гэсэн тохироонд хүрч, өчигдөр /2026.03.27/ нэг юм УИХ-ын чуулганы ирцээ бүрдүүлж, Г.Занданшатарыг огцруулсан байна.
Харин маргааш /2026.03.29/ “Н.Учралыг Ерөнхий сайдад нэр дэвшүүлэх” асуудлыг МАН-ын Бага хурлаараа хэлэлцэж, хэнийг УИХ-ын дарга болгохоо ирэх долоо хоногт МАН-ын бүлгийн хурал дээрээ шийдвэрлэнэ. Цаашлаад Н.Учралын Засгийн газрын танхимд ажиллах сайд нарын нэрс ч зурагдана. Тэгвэл энэ бүхэнд Д.Амарбаясгалан голлон оролцох нь. Харин Л.Оюун-Эрдэнийг тоглоомоос бүр мөсөн гаргаж, дахин намын бодлогодоо оролцуулахгүй байх төлөвтэй байна.
-ҮНЭД ОРСОН Д.АМАРБАЯСГАЛАНГ МАН-ЫН ГИШҮҮНЧЛЭЛЭЭС ХАСАЖ ЧАДАХГҮЙ-
Авлига, албан тушаалын хэргээр шалгагдаж, МАН-ын гишүүнчлэлээс хөөгдөхдөө тулаад буй Д.Амарбаясгалан сүүлийн үед “нүүр дүүрэн инээмсэглэлтэй” Төрийн ордонд алхах болсон нь түүнтэй МАН-ын удирдлагууд тохирч, "үнэд орсон"-той холбоотой. Тэгвэл түүнийг "Эрх мэдэл, албан тушаалын байдлаа урвуулан ашиглах", "Үндэслэлгүйгээр хөрөнгөжих", "Нийтийн албан тушаалтан хахууль авах" гэсэн зүйл ангиудаар яллагдагчаар татан, мөрдөн шалгах ажиллагааг үргэлжлүүлж байгаа. Мөн Д.Амарбаясгалангийн УИХ-ын гишүүний бүрэн эрхийг түдгэлзүүлэх бичиг Улсын Ерөнхий Прокурорын газраас парламентад ирсэн байж магадгүй байгаа.
Нөгөөтэй, хоёрдугаар сарын 27 /2026.02.27/-ны өдөр болсон МАН-ын Бага хурлын үеэр авлига, албан тушаалын хэрэгт яллагдагчаар татагдсан УИХ-ын гишүүн Д.Амарбаясгалан болон Үндсэн хууль зөрчсөн нь Цэцийн дүгнэлтээр тогтоогдсон Х.Булгантуяа нарыг МАН-ын гишүүнээс чөлөөлөх нь зүйтэй” гэж МАН-ын дарга Н.Учрал мэдэгдсэн. Иймээс МАН-ын Хяналтын хороо Д.Амарбаясгалан нарыг МАН-ын гишүүнчлэлээс чөлөөлөх процессыг эхлүүлсэн байдаг.
ВИДЕО: МАН-ын дарга Н.Учралын мэдэгдэл
Харин Л.Оюун-Эрдэнэд “үнэд орж” байсан шигээ Д.Амарбаясгалан өдгөө МАН-ын дарга Н.Учрал, Ерөнхий нарийн бичгийн дарга Я.Содбаатарт нарт “үнэд орлоо.” Иймд түүнийг МАН-ын гишүүнчлэлээс чөлөөлөх нь үү, түүнийг холбогдуулан шалгаж буй хэргүүд хэрхэн үргэлжлэх зэргийг харах л үлдэж байна.
