Замын-Үүд боомтоор бараа бүтээгдэхүүнээ үнэн зөв, бүрэн мэдүүлэлгүйгээр, шаардлага хангахгүй нэг тонн нийлэг, хальсан уутыг хууль бусаар улсын хилээр оруулахыг завджээ.
Засгийн газраас 2019 оны гуравдугаар сарын 1-нээс өргөн хэрэглээний нийлэг уутыг худалдаанд гаргах, хэрэглэхийг хориглосон.
Нийлэг уутыг худалдаалах, хэрэглэхийг хориглож, хэрэглээг нь хязгаарлах шийдвэрийн хэрэгжилтэд Гаалийн ерөнхий газар, МХЕГ хяналт тавьж ажилладаг. Уг зөрчлийг Мэргэжлийн хяналтын байгууллагаас илрүүлэн хураан авсан байна.
Зөрчлийн тухай хуулийн 6.1.4 дүгээр заалтад “Хууль дүрэм стандартад заасан шаардлагад нийцээгүй сав баглаа боодлыг үйлдвэрлэсэн, импортолсон, худалдаа үйлчилгээнд хэрэглэсэн бол хувь хүнийг 300 нэгж буюу 300 мянган төгрөг, хуулийн этгээдийг 3000 мянган нэгж буюу гурван сая төгрөгтэй тэнцэх хэмжээний мөнгөн торгууль ногдуулна” гэж заасан байдаг.
