Гурван мянган ам.долларын хахууль авсан гэх хэргээр анх АТГ-аас саатуулан шалгаж байсан "Багануур" ХК-ийн гүйцэтгэх захирал асан Э.Номинчулуун нарт холбогдох хэргийг шүүх хурал товлогджээ.
Тодруулбал, "Багануур" ХК-ийн гүйцэтгэх захирал асан Э.Номинчулуун, уурхайн ерөнхий нягтлан бодогч П.Эрдэнэ нарын 14 хүнд холбогдох хэргийг шүүх хурал ирэх пүрэв гарагт буюу наймдугаар сарын 17-ны өдөр Сүхбаатар дүүргийн Эрүүгийн хэргийн анхан шатны шүүхэд болохоор товлогдсон байна. "Багануур" ХК-ийн гүйцэтгэх захирал асан Э.Номинчулуун нарт Нийслэлийн прокуророос Эрүүгийн хуулийн 22.1-2, 22.4-1, 22.5-1 дэх хэсэгт зааснаар яллах дүгнэлт үйлдэж, хэргийг шүүхэд шилжүүлжээ.
Эргэн сануулахад, “Багануур” ХК-ийн гүйцэтгэх захирлаар ажиллаж байсан Э.Номинчулууныг тус компаниас зарласан өндөр үнийн дүнтэй тендерт “Тавинлан” компанийг шалгаруулан, ажил гүйцэтгэх явцад нь төсөвт өртгийг нэмж, “Тавинлан” ХХК-ийн захирал Х.Цогнойжамцаас “Алтаргана” хотхонд 500 сая төгрөгтэй тэнцэх тансаг зэрэглэлийн, таван өрөө орон сууц бэлгэнд авсан гэх хэрэгт буруутган шалгасан гэх мэдээлэл байдаг юм.
