Азийн Физикийн олимпиадаас хүрэл медаль хүртсэн сурагч Л.Дөлгөөнийг гурван сая төгрөгөөр урамшуулжээ

Азийн Физикийн олимпиадаас хүрэл медаль хүртсэн сурагч Л.Дөлгөөнийг гурван сая төгрөгөөр урамшуулжээ

Азийн Физикийн 23 дахь удаагийн олимпиадад зохион байгуулагч орны хувиар манай улс 16 сурагчтай хоёр баг бүрдүүлэн оролцсон юм.

Үндэсний багийг МУИС-ийн багш Д.Улам-Оргих тэргүүтэй дөрвөн багш дасгалжуулсан бөгөөд Монгол улсын багийн гишүүн 11 дүгээр сургуулийн сурагч Л.Дөлгөөн хүрэл медалийн болзол хангаж, өчигдөр шагналаа гардан авсан.

Тэгвэл өнөөдөр Боловсрол, шинжлэх ухааны сайд Л.Энх-Амгалан сурагч Л.Дөлгөөн болон олимпиадын хорооны болон багш нарын төлөөллийг хүлээн авч уулзжээ.

Азийн физикийн олимпиадад амжилттай оролцсон сурагч Л.Дөлгөөнийг гурван сая төгрөгөөр урамшуулсан бол 11 дүгээр сургуулийн физикийн багш Ж.Хатанбаатарт зөөврийн компьютер гардуулан өгчээ.

Мөн олимпиадад бэлтгэсэн багш нарт дурсгалын зүйл гардуулан өгсөн байна. 

Хэдийгээр олимпиадад үндэсний багийн багш нар сурагчдыг бэлтгэсэн ч сүүлийн зургаан жилийн турш сурагчид Физикийн хичээл заасан багшийн хөдөлмөр өнөөдрийн амжилтад чухал нөлөөтэй хэмээжээ. 

Уулзалтын үеэр олимпиадын бодлого боловсруулалт, бага ангиас нь эхлэн сурагчдыг байгалийн ухааны хичээлд дур сонирхолтой болгох, ментор багш бэлтгэх гээд олон сэдвээр санал солилцсон байна.