ХӨСҮТ-ийн ерөнхий захирал Л.Баттөрийг үүрэгт ажлаас нь чөлөөлж өмнөх захирал Д.Нямхүүг томилсон байж магадгүй. Бид баталгаажуулахаар ажиллаж байна гэх мэдээллийг бид өмнө нь хүргэсэн.

Тэгвэл эх сурвалжийн мэдээлж буйгаар Л.Баттөр үүрэгт ажлаасаа чөлөөлөгдөх хүсэлтээ өгснийг шийдвэрлэж түүний оронд Улсын хоёрдугаар төв эмнэлгийн дэд захирал Ц.Билэгтсайханыг томилжээ. 

Эргэн сануулахад Л.Баттөрийг 2021 оны гуравдугаар сарын 19-нд ХӨСҮТ-ийн захирлаар томилсон юм. Тэрбээр ажлаа өгсөн гэдгээ нээлттэй мэдэгджээ. Шинээр томилсон Ц.Билэгтсайхан нь 2014 оноос өнөөдрийг хүртэл Хоёрдугаар төв эмнэлгийн дэд захирлаар ажиллаж байжээ. Тэрээр микробиологи дархлал судлалын чиглэлээр Япон улсад докторын зэрэг хамгаалсан байна.

Энэ оны нэгдүгээр сарын 19-ний орой “Өргөө” амаржих газарт төрсөн эхийг ХӨСҮТ рүү шилжүүлэхдээ гаргасан алдаанаас болж ХӨСҮТ-ийн Ерөнхий захирал Д.Нямхүүг тухайн үеийн Эрүүл мэндийн сайд Т.Мөнхсайханы тушаалаар үүрэгт ажлаас нь чөлөөлсөн.

Иймд Д.Нямхүү “Ажлаас нь хууль бусаар халсан” хэмээн буцаж томилогдох хүсэлт бүхий нэхэмжлэлийг Сүхбаатар дүүргийн Иргэний анхан шатны шүүхэд гаргасан байдаг.

Д.Нямхүүгийн нэхэмжлэлтэй, Эрүүл мэндийн яаманд холбогдох ажилд эгүүлэн тогтоолгох, шүүхээр маргааныг шийдвэрлэх хүртэлх хугацааны цалинг гаргуулах, ажилгүй байсан хугацааг нийгмийн болон эрүүл мэндийн даатгалын шимтгэл төлснөөр тооцуулах тухай нэхэмжлэлтэй иргэний хэргийн шүүх хуралдаан өнгөрсөн сард /2021.08.12/ Сүхбаатар дүүргийн Иргэний хэргийн анхан шатны шүүхэд болж түүнийг ажилд нь буцааж томилох шийдвэр гаргасан.

Тэгвэл Эрүүл мэндийн яамнаас дараагийн шатны шүүх рүү давж заалдаагүй бололтой. 

Учир нь Д.Нямхүү ХӨСҮТ-ийн захирлын ажлаа хийж эхэлсэн гэх мэдээлэл байна. Үүнийг бид дахин баталгаажуулах болно. Ямартай ч өмнө нь ХӨСҮТ-ийн захирлаар ажиллаж байсан Л.Баттөр "Би ХӨСҮТ-ийн захирлын ажлаа хүлээлгэн өгсөн" гэж мэдэгджээ.