2020 оны нэгдүгээр сарын 23-24 нд шилжих шөнө Монгол улсын иргэн П, ОХУ-ын иргэн Г нар манай улсад 50 мянга гаруй ам.доллартай явж байхад нь, Тагнуулын байгууллагын Н гэгч нь өөрийн доор нэг бүлэгт хамт ажилладаг М, Т, Д, Л, Б нарын таван ажилтантайгаа хамтран дээрэмдсэн хэрэг гарсан. Тагнуулын албан хаагчид тус иргэдийг дээрэмдэхдээ галт зэвсэг /байлдааны буу/ ашигласан болох нь тогтоогдсон талаар тухайн үед мэдээлж байв.
Тэгвэл энэ оны эхээр болсон анхан шатны шүүх хурлаас Эрүүгийн хуулийн 17.2-2 болон мөн хуулийн 18.6-1 дэх хэсэгт заасны дагуу тэднийг буруутгаж Н-д 5 жил 8 сар хорих ял, Т-д 4 жил 8 сар хорих ял, Д, Л нарт 3 жил 8 сар, М, Б нарт 3 жилийн хорих ял оноосон байдаг. Тэгвэл тэд давж заалдах шатны шүүхэд гомдол гаргасан байна. Иймд тус шүүх хурал өнгөрөгч долоо хоногт болж анхан шатны шүүхийн шийдвэрийг хэвээр үлдээжээ.
