Увс аймгийн Сагил сумын ... багт оршин суудаг иргэн А-г гэртээ байхад нь түүний эхнэр М нь “түүний хоолонд найман ширхэг зүү” хийж хорлохыг завдсан гэх гомдол мэдээлэл тус аймгийн цагдаагийн газарт өнгөрөгч нэгдүгээр сарын 24 /2021.01.24/-ны өдөр ирсэн талаар бид өмнө нь мэдээлж байсан.
Тодруулбал, энэхүү хэрэгт холбогдоод байгаа М нь гэр бүлээс гадуурх харилцаанаас үүдэн нөхөртөө дургүй болсон учраас А-аас салахын тулд, түүний амь насыг хороох зорилгоор “түүний хоолонд нь зүү хийсэн” байж болзошгүй нөхцөл байдал тогтоогдоод байсан гэдэг. Тус хосууд гэр бүл болоод 3 орчим жил болж байгаа бөгөөд нөхөр болох А нь 1986 онд төрсөн, эхнэр болох М-ээсээ таван насаар ах нэгэн байдаг.
Тэгвэл Увс аймгийн прокурорын байгууллагаас А-ын эхнэр М-д Эрүүгийн хуулийн 10.1-1 д зааснаар яллах дүгнэлт үйлдэж шүүхэд шилжүүлсэн байна. Улмаар анхан шатны шүүх хурал өнгөрөгч долоо хоногт болж М-д “Хүний амь насыг хөнөөхийг завдсан гэм буруутайд тооцож, 2 жил, 6 сарын хорих ял оноосон” талаар албаны эх сурвалж мэдээллээ.
