Шивээ овоо ХК-ийн нүүрс ачилтын хэсэгт өнгөрсөн шөнийн 03:00 цагт гал гарсан талаар бид өнөөдөр мэдээлсэн. 

Иймд бид эх сурвалжаас, "галын нөхцөл байдал юу болж байгаа", "уурхайн үйл ажиллагаанд ямар хүндрэл гарсан" талаар дахин тодруулахад, “Нүүрс тээх дамжлагын вагон ачилтын хэсэгт гарсан галыг бүрэн унтрааж дууслаа. Тус галаас болж ДЦС-3, 4 зэрэг дулааны станцуудад нийлүүлдэг нүүрсэнд ямар нэгэн хоцрогдол хүндрэл гараагүй. Харин галын шалтгааныг урьдчилсан байдлаар цахилгаанаас болсон гэж таамаглаж байна. Учир нь өчигдөр /2021.04.25/ бороо их орж чийгтэй байсан болохоор, цахилгааны утас масалж гал гарсан гэх урьдчилсан таамагтай байна” гэсэн мэдээллийг өглөө. 

Шивээ овоо ХК-ийн нүүрс ачилтын хэсэгт өнгөрсөн шөнө гал гарсан, улмаар одоог хүртэл тус галыг бүрэн унтрааж чадаагүй байгаа гэх мэдээлэл байна. 

Бид энэ талаар эх сурвалжаас тодруулахад, “Өнгарсөн шөнө /2021.04.26/-ийн 03:00 цагийн орчим “Шивээ Овоо” ХК-ийн нүүр тээх дамжлагын вагон ачилтын хэсэгт гал гарсан, одоогоор галыг бүрэн унтрааж чадаагүй байна. Вагон ачилтын хэсгийн тоног төхөөрөмжийн сэндвичин дулаалгын завсар орсон нүүрс бүрэн унтраагүй, унтраахаар ажиллаж байна” гэсэн юм.

Шивээ-Овоо ХК нь 1990 онд байгуулагдсан. Говьсүмбэр аймгийн Шивээговь сумыннутагт байршилтай стратегийн ач холбогдолтой Шивээ-Овоогийн хүрэн чулуун нүүрсний уурхайгаас нүүрс олборлодог. Монгол улсын дотоодын эрчим хүчний нүүрсний хэрэглээний 28.3 хувийг нийлүүлж, Монгол улсын Эрчим хүчний 70 хувийг дангаараа үйлдвэрлэдэг “ДЦС-4” ТӨХК-ийн нүүрсний хэрэглээний 51 хувийг хангадаг ба "ДЦС-3", Амгалан дулааны станц, Бор-Өндөр УБҮ, Дорноговь, Говьсүмбэр, Төв аймаг, Сэлэнгэ зэрэг цахилгаан, дулааны станцуудад нүүрсээ нийлүүлдэг байна.