Саяхан Цагаан ордонд болсон хүлээн авалтын үеэр АНУ-ын ерөнхийлөгч Дональд Трамп дөрвөн жилийн дараа болох сонгуульд өрсөлдөх бодолтой байгаагаа ярьсныг уг арга хэмжээнд оролцсон гэрчүүд мэдээлжээ.
Тэрбээр энэ удаагийн сонгуулийг луйвар, будлиантай болсон гэж үзээд өрсөлдөгч Жо Байдены ялалтыг хүлээн зөвшөөрөөгүй байгаа юм. Трамп сонгуулийн үр дүнг өөрчлөхийн тулд шүүх дээр тэмцэж байгаа ч үр дүн муутай байна. Хэрвээ энэ удаа ялж чадахгүй бол 2024 оны сонгуульд өрсөлдөнө гэдгээ мэдэгдсэн байна.
Тэрээр “Бид дахин дөрвөн жил ерөнхийлөгчөөр ажиллахын төлөө тэмцэж байна. Хэрвээ энэ тэмцэл үр дүнд хүрэхгүй бол дөрвөн жилийн дараа уулзацгаая” гэж Трамп хүлээн авалтын үеэр зочдод хандаж, мэдэгдсэн байна.
Арваннэгдүгээр сарын 3-нд болсон сонгуулийн санал хураалтын дараа Дональд Трамп ивээн тэтгэгчид, дэмжигчдээсээ $170 сая орчмыг “Сонгуулийг Хамгаалах Сан” нэртэй санд цуглуулж чадсан гэх мэдээлэл бий. Тэрбээр энэ хөрөнгийг цаашдын улс төрийн үйл ажиллагаандаа, тэр дундаа дараагийн сонгуулийн кампанит ажилдаа зарцуулах магадлалтай байна.
Эх сурвалж: NBC news
