Засгийн газрын 2022 оны 260 дугаар тогтоолоор “Монгол Улсыг олон улсад сурталчлан таниулахад онцгой амжилт гаргасан иргэн, баг, хамтлагт Монгол Улсын Ерөнхий сайдын нэрэмжит мөнгөн шагнал олгох журам”-ыг баталсан. Улмаар Ерөнхий сайдын 2026 оны нэрэмжит шагналыг дэлхийн дуурийн шилдэг дуучин, Монгол Улсын Ардын жүжигчин Энхбатын Амартүвшинд олгохоор шийдвэрлэсэн талаар бид өмнө нь мэдээлсэн.
Шагналд олгох 200 сая төгрөгийг Засгийн газрын нөөц сангаас гаргах юм. Тэгвэл тус шагналыг гардуулах ёслол өнөөдөр /2026.02.06/ 15.00 цагт Төрийн ордонд болж, Э.Амартүвшинд Ерөнхий сайдын нэрэмжит шагналыг олголоо. Тэрбээр энэ талаараа, "Өчүүхэн хөдөлмөрийг маань үнэлж, энэ шагналыг олгож байгаа явдалд маш их баяртай байна. Маргааш тоглолт маань болно" гэлээ.
Энхбатын Амартүвшин нь 2009-2016 онд Дуурь бүжгийн эрдмийн театрт дуучнаар ажиллаж, одоо Бүгд Найрамдах Итали Улсад ажиллаж, уран бүтээлээ туурвиж байна. Э.Амартүвшин дэлхийн сонгодог урлагийн дээжис болох “Кармен”, “Травиата”, “Риголетто”, “Евгений Онегин”, “Тоска”, “Айда”, “Троваторе” зэрэг алдартай дуурийн гол болон туслах дүрд амжилттай тоглож, дуурийн урлагийн гайхамшгийг Итали, Франц, Герман, Австри, Испани, Орос, Япон, Сингапур, Англи, Бельги, Америк, Унгар, Болгар, Хятад зэрэг дэлхийн олон орны томоохон театрын тайзнаас үзэгч олонд дуурсган толилуулж буй дэлхийн шилдэг баритон юм.
