Өчигдөр /2023.06.14/ орой Засгийн газар ээлжит бусаар хуралдаж, "Авлигатай тэмцэх үндэсний хөтөлбөр батлах тухай" УИХ-ын тогтоолын төслийг хэлэлцэж, өнөөдөр /2023.06.15/ УИХ-д өргөн мэдүүлэхээр болжээ.
Зарим эх сурвалжийн мэдээлж буйгаар, "Авлигатай тэмцэх үндэсний хөтөлбөр батлах тухай УИХ-ын тогтоол болон Ашиг сонирхлын хуулийг парламент яаралтай горимоор хэлэлцэж батлахаар болсон” гэх мэдээллийг өгч байна.
Тус УИХ-ын тогтоол болон хууль батлагдсанаар Засгийн газраас хэрэгжүүлж байгаа Шувуу, Шүүр, Шүгэл, Шилжүүлэн авах, Шил гэсэн “Таван Ш” ажиллагаа эрчимжиж авлига албан тушаалын хэргээр шалгагдаж байхдаа орон зайлсан хүмүүсийг ч олж ирэх ажиллагаа хурдтай явагдах ажээ. Мөн авлигын гэмт хэргээс урьдчилан сэргийлэх, таслан зогсоох, хянан шийдвэрлэх эрх зүйн орчин сайжирна гэж үзэж байгаа ажээ.
