Төрийн соёрхолт дуучин Д.Болдыг өнгөрсөн гуравдугаар сарын 18-ны өдөр Хан-Уул дүүргийн цагдаагийн 1-р хэлтсээс сураггүй алга болсон иргэдийн жагсаалтанд оруулжээ. Энэ талаарх мэдээлэл сая цахим орчинд тарж, иргэдийн анхаарлыг багагүй татаад байна. ЦЕГ-ын цахим хуудсанд орсон түүний талаарх мэдээллийг олон хүн хуваалцаж, дуучин Д.Болдоос лавлахад тэрээр өөрийн нүүр хуудсаараа дамжуулан “Би өргөө гэртээ “Ододтой бүжиглэе” шоу үзээд хэвтэж байна шүү. Гайхаад л байж байна” гэсэн хариултыг өгчээ.
Харин сураггүй алга болсон иргэдийн жагсаалтын тайлбар дээр дуучин Д.Болдыг Хан-Уул дүүргийн Иргэний хэргийн анхан шатны шүүхийн шийдвэртэй холбоотойгоор эрэн сурвалжилж байгаа талаар мэдэгдсэн байна. Үүнээс харахад дуучин Д.Болд Хан-Уул дүүргийн Иргэний хэргийн анхан шатны шүүх дээр маргаантай байгаа бөгөөд шүүхээс товлон дуудсан цагт ирээгүй учраас цагдаагийн байгууллагаас эрэн сурвалжилж байж болзошгүй байна.
