2019 оны долдугаар сарын 29-ны өдөр Өвөрхангай аймгийн цагдаагийн газарт тус аймгийн Богд сум VII багын нутаг дэвсгэрт эрэгтэй хүнийг амь насыг нь хохироогоод шороонд булсан байна гэсэн дуудлага мэдээлэл иржээ.

Тус дуудлага мэдээллийн дагуу алба хаагчид хэргийн газарт үзлэг хийж ажиллахад Өвөрхангай аймгийн Арвайхээр суманд оршин суух хаягтай, эрхэлсэн тодорхой ажилгүй, 35 настай, эрэгтэй “Э”-г гадны нөлөөтэй нас барсан нөхцөл байдлыг тогтоосон байна.

Дээрх гэмт хэргийг үйлдсэн байж болзошгүй тухайн аймагт оршин суух хаягтай эрхэлсэн тодорхой ажилгүй Б, Д, Х нарыг өнөөдөр өглөө дайчлан баривчилж цагдан хорих таслан сэргийлэх арга хэмжээг авч мөрдөн шалгах ажиллагааг явуулж эхэлжээ.

-ХЭН БОЛОХ НЬ ҮЛ МЭДЭГДЭХ ЭРЭГТЭЙ ХҮНИЙ ЦОГЦОС ХЭЭР БУЛАГДСАН БАЙСАН-

Мал хариулж явсан иргэн газар доор булсан хүний цогцосыг олжээ. Тодруулбал, Өвөрхангай аймгийн Богд сумын нутагт хээр хүний амь бүрэлгээд булсан байсан хэргийг энгийн малчин малаа хариулж яваад олж улмаар цагдаагийн байгууллагад мэдэгдсэн байна.

Хээр булагдсан байсан цогцос олон хоног орсон борооны усанд зарим хэсэг ил гарсан байснаар малчин иргэн олж харсан байгаа юм.

Өвөрхангай аймгийн Богд сумын төвөөс хойш найман километр зайтай хээр талд хэн болох нь үл мэдэгдэх эрэгтэй хүний цогцсыг булсан байсан хэрэг ийнхүү ил болсон байна. Одоогийн байдлаар Өвөрхангай аймгийн цагдаагийн хэлтэст гадны нөлөөтэй байж болзошгүй нас барсан цогцост шинжилгээ хийж эхэлсэн. Мөн газарт булагдсанаас хойш хэд хоног болсон, хэн гэдэг амь хохирогч байсан, энэ хэргийг хэн үйлдсэн гэх зэргээр мөрдөн шалгах аж.

Газарт булагдсан байсан цогцос урьдчилсан байдлаар бусдад алуулсан байж болзошгүй байсан гэдгийг эх сурвалж мэдээллэв.

У.УРАНЦЭЦЭГ