LIVE: Шангри-Ла буудал төлбөр төлөөгүй гэж Lexus 570-ын дугуйг түгжиж, эзэнд нь өгөхгүй байна гэв

Учир нь бид дээрх мэдээллийн мөрөөр тус автомашины холбогдох эзний, бүртгэлтэй 9910.... гэх утасны дугаарыг олж, тайлбар авахаар залгасан юм. Гэтэл тэрээр цаанаа Хятад хүнтэй нилээд удаан ярьсны эцэст "би сайн мэдэхгүй байна" гэсэн хариултыг өгсөн. Иймд бид "Шангри-Ла зочид буудлын автозогсоолд удаан хадгалагдаж буй LEXUS 570 машин Хятад эзэнтэй юу" гэх мэдээллийг хүргэсэн билээ.

Тэгвэл тус автомашины талаар эх сурвалж тайлбар мэдээллийг өглөө. Тэрээр “Шангри-Ла буудлын авто зогсоолд хаягдсан гэх Lexus 570 автомашиныг төлбөр өгөөгүй гэсэн шалтгаанаар дугуйг нь түгжиж, эзэнд нь өгөхгүй байна” гэсэн юм.

Шангри-Ла зочид буудлын автозогсоолд удаан хадгалагдаж буй LEXUS 570 машин Хятад эзэнтэй юу

Нийслэлийн Сүхбаатар дүүргийн нэгдүгээр хороонд байрлах Шангри-Ла зочид буудлын B1 давхрын автозогсоолд Lexus 570 маркын автомашиныг эзэн нь авалгүй нилээд удаж байгаа талаар 14 хоногийн өмнөөс яригдаж эхэлсэн. Уг автомашиныг оффшор мөнгөөр авсан байж болзошгүй, мөн эзэн нь машины дотор байх мөнгөө ч авахгүй байгаа гэх мэдээлэл тараад байгаа юм.

Шангри-Ла зочид буудалд оффшоор мөнгөөр авсан энэ машин аа хэн нэг нь авалгүй орхиод явсан, дотор нь байх мөнгөө ч гаргаж авахгүй байгаа гэсэн яриа түгээд байна. Хэний машин бээ pic.twitter.com/KWvg5Jwgvy
— Мишигжав (@mishigjav1) November 2, 2020

Бид дээрх мэдээллийн мөрөөр тус автомашины холбогдох эзний 9910.... гэх утасны дугаарыг олж, тайлбар авахаар залгасан юм. Гэтэл тэрээр өөрийнх нь автомашин мөн эсэхийг тодруулахад цаанаа Хятад хүнтэй нилээд удаан ярьсны эцэст "би сайн мэдэхгүй байна" гэсэн хариултыг өгсөн юм. Өөрийнх нь утасны дугаараар бүртгэлтэй байхад яагаад мэдэхгүй байгаа талаар асуухад тэрээр хариулт өгөхөөс татгалзаж, утсаа салгасан бөгөөд дахин залгатал "мессеж роуминг" үйлчилгээнд шилжүүлсэн байв.

Lexus 570 маркын уг автомашин нь хувь хүн дээр биш, ЭКЕАЙН гэх байгууллагын нэр дээр бүртгэлтэй байсан ч, уг нэрээр хайхад ямар нэг байгууллагын мэдээлэл гарч ирэхгүй байгаа юм.

Тиймээс тус автомашины 8361УНС гэх улсын дугаараар нээлттэй мэдээлэл болох торгуулийн мэдээллийг хайж үзвэл ердөө ганцхан торгууль байх бөгөөд 2016 оны арваннэгдүгээр сарын 6-ны өдөр Булган аймаг, Мөрөн чиглэлд зөрчил гарган, 48 мянган төгрөгөөр торгуулсан баримт гарч ирсэн юм.

Энэ бүхнээс үзэхэд ямартай ч уг автомашин монголд нилээд олон жилийн өмнөөс явж байсан бөгөөд бүртгэлтэй утасны дугаараар залгахад дуудлага авсан хүн нь цаашаа Хятад хүнтэй ярьж зөвлөн, хариулт хэлэхээс татгалзсаныг харгалзан үзвэл Хятад эзэнтэй байж болзошгүй гэсэн таамгийг төрүүлж байгаа юм.