Эмнэлэг эрүүл мэндийн байгууллагын талаар гомдол мэдээлэл тасардаггүй гэхэд болно. Тухайлбал, эмнэлгийн байгууллагад ажилладаг хүмүүсийн хүнд суртал, үзүүлэх оочир дараалал, зарим эмч нарын чадвар үргэлж шүүмжлэл дагуулдаг гэхэд болно. Нөгөөтэй сүүлийн жилүүдэд тогтмол шахуу нийслэл, орон нутагт цахилгаан эрчим хүчийг тасалж, энэ нь нийгэм, ахуй нэгжүүдийн хэвийн үйл ажиллагаанд саад учруулах болсон.
Хамгийн ноцтой нь манай нийгэмд гарч буй энэ байдлыг “хэвийн” байдаг л үзэгдэл мэтээр олон иргэн хүлээж авдаг болсон. Учир нь алдаа, дутагдалтай энэ байдлыг засаж, залруулахыг иргэд бодлого гаргагчдаас шаардаж байж л засагдах учиртай.
Тэгвэл манай эрүүл мэндийн тэргүүлэх байгууллага болох Улсын нэгдүгээр төв эмнэлэгт буруу онош, цахилгааны саатлын улмаас Монгол Улсад зорчиж байсан гадаадын улсын иргэн амиа алдсан харамсалтай хэрэг гарсан байна. Тодруулбал, нэгэн иргэнээс Эрүүл мэндийн яаманд гомдол ирсэн байна. Иймд тус иргэний гомдолд дурдагдсан хэрэг явдлыг ноцтой гэж үзэн Эрүүл мэндийн яамнаас Улсын нэгдүгээр төв эмнэлэгт дотоод аудитын шалгалт оруулж, ерөнхий захирал Л.Бямбасүрэнг шалгаж эхэлсэн байна.
Учир нь Эрүүл мэндийн яаманд хандсан иргэн гомдолдоо, “өнгөрөгч зургаадугаар сар /2025.06/-д Монгол Улсад аялж явсан АНУ-ын иргэний бие муудаж Улсын нэгдүгээр төв эмнэлэгт үзүүлсэн боловч, түүний өвчнийг оношилж чадалгүй амь эрсэдсэн.
Тодруулбал, АНУ-ын иргэний өрцний нүхээр ходоод нь орж хавчигдсан байж болзошгүй байхад тус эмнэлгийн эмч О.Г нь оношилж чадалгүй 7 хоног болгосноос гадаад иргэний ходоод үхэжсэн гэж үзэж байгаа. Харин биеийн байдал хүндэрсний дараа ходоод тайрах мэс засал хийж өвчтөн сэхээнд орсон.
Гэтэл энэ үеэр нь Улсын нэгдүгээр төв эмнэлэгт 1 цаг орчмын хугацаанд цахилгааны доголдол гарч амьсгалын аппарат ажиллахгүй өвчтөн, АНУ-ын иргэн нас барсан. Цахилгаан тасарсан тухайн цаг мөчид Улсын нэгдүгээр төв эмнэлгийн цахилгааны дэд станц ажиллаагүй. Энэ явдал 2025 оны зургаадугаар сарын 23-ны өдөр болсон хэмээн бичжээ.
Иймд энэхүү гомдлын дагуу тус эмнэлэгт Эрүүл мэндийн яамнаас шалгалт оруулсан байна. Дээрхээс гадна тус эмнэлгийн дотоод зохион байгуулалт, эмч ажилчдын харилцаа хандлага мөн үйл ажиллагаа нь муудаж байгаа талаарх өөр олон иргэнээс ч гомдол, мэдээлэл ирээд байгаа аж.
