2024 оны зургаадугаар сард 20 настай эрэгтэй Ц.Дагвадорж гэгч нь 16 болон 32 настай хоёр эмэгтэйг хөнөөгөөд, хэргээ нуун далдлахын тулд цогцсыг чемодан, хувцасны шүүгээнд хийж нуусан онц ноцтой хэрэг гарсан байдаг. Улмаар тухайн хэрэгт Ц.Дагвадорж, Х.Энхсайхан гэх этгээдүүдийг яллагдагчаар татсан бол Э.Ган-Эрдэнэ, Э.Номин-Эрдэнэ нарыг прокуророос хохирогчоор тогтоон, хэргийг шүүхэд шилжүүлсэн байдаг. Гэтэл талийгаач охины ээж охиных нь цогцсын дэргэд сууж буй Э.Ган-Эрдэнэ, Э.Номин-Эрдэнэ нарын зургийг олон нийтийн сүлжээнд нийтэлснээр тэднийг яллагдагчаар татсан байдаг.
Тэгвэл тус хэрэгт яллагдагчаар татагдаад буй Э.Ган-эрдэнийн ээж манай редакцад хандсан юм. Тэрээр энэ хэргийн талаар зарим зүйлсийг иргэд, олон нийт мэдэх ёстой хэмээн үзэж буйгаа илэрхийлсэн юм. Бид түүний аюулгүй байдлыг хангахын тулд нэр, царайг нь нууцалсан болно.
ВИДЕО:
"ХҮҮ МИНЬ АМЬ НАСАА ЭРСДЭЛД ОРУУЛЖ, ЦАГДААД ХЭЛЖ, Ц.ДАГВАДОРЖИЙГ БАРИВЧЛУУЛААГҮЙ БОЛ ТЭР ГАДААД УЛС РУУ ОРГОН ЗАЙЛАХ БАЙСАН"
-Таны хүү ер нь яаж байгаад энэ онц ноцтой гэмт хэрэгт холбогдчихов. Эндээс ярилцлагаа эхэлье.
Таны сайтын уншигчдад энэ өдрийн мэнд хүргэе. Миний хувьд олон нийтийн сүлжээнд тархаад байгаа зарим буруу ташаа мэдээлэлд үнэн зөв, бодит мэдээлэл өгөхийг хүссэн. Миний хүү нэг барилгын компанид борлуулагч хийдэг. Мөн ажлынхаа зав зайгаар Ubcab-д такси үйлчилгээнд явдаг. Тухайн хэрэг бол 2024.06.20-21-нд шилжих шөнө гарсан. Харин манай хүү 2025.06.20-нд таксинд явахаар гарсан. Яг гэрийнх нь ойрхон дуудлага ирж, үйлчлүүлсэн хүн нь энэ хэргийг үйлдсэн этгээд. Тэр хүн хүлээлгийг нь асаалгаад л нэлээн олон газраар явсан байгаа юм. Тэгээд хамгийн сүүлд iloft бааран дээр очоод хүлээлгэж байгаад тэндээ бууж үлдсэн. Харин тухайн үедээ “Би хоёр хоногийн дараа Япон явна. Намайг нисэх онгоцны буудал хүргэж өгөөрэй” хэмээн утасны дугаарыг нь авсан юм билээ. Ингээд анх энэ этгээдтэй таарсан. Өөрөөр хэлбэл, өмнө нь таньдаг хүмүүс биш гэсэн үг. Тухайн өдрөө ч манай хүү надад ийм хүнтэй танилцаж, олон газраар явсан талаар ярьж байсан. Харин маргааш нь нөгөө хүн холбогдоод Япон явахаасаа өмнө нэг уулзъя, бүх найзуудтайгаа уулзаж байгаа гээд дуудсан байгаа юм. Хүү маань гэрээсээ 2025.06.20-ны орой 23 цагт гарсан. Тэгээд би шөнө 03 цаг өнгөрч байхад сэрсэн юм. Унтаж байгаад сэрчхээд хүүгийн өрөө рүү харсан чинь байдаггүй. Тэгээд ээжээс хүү хаачсан юм бол гээд асуусан чинь “Нөгөө өчигдрийн таарсан залуу нь нэг уулзаадахъя гээд дуудсан. Удахгүй гээд гарсан ирээгүй байна уу” хэмээсэн. Тэгээд утас руу нь залгаад ерөөсөө утсаа аваагүй. Мессенжерээр чат бичээд мөн л хараагүй. Ер нь манай хүүхэд найз нөхөд, ажил төрлийнхөнтэйгөө явж байхдаа хэзээ ч утсаа авахгүй явдаггүй. Бүх зүйлээ яриад тайлбарладаг. Харин тэр шөнө бол ерөөсөө утсаа аваагүй. Тэгээд би хүлээж байтал 05 цаг өнгөрч байхад манай хүүгээс дуудлага ирсэн. Би утсаа сандраад л авч байгаа шүү дээ. Тэгээд л миний хүү яав гээд асуусан чинь “Ээжээ, та гялс Хан-Уул дүүргийн цагдаагийн газар хүрээд ирээч гэсэн. Өөрөө бүүр амьсгаадаж, сандарсан байсан. Тэгээд би бушуухан хувцсаа өмсөөд Хан-Уул дүүргийн цагдаагийн хэлтэс рүү гүйсэн. Очоод хүүтэйгээ уулзаад юу болов гэтэл хамт байсан залуу найз охиныхоо хоолойг боогоод алчихлаа гэж хэлсэн. Би сонсоод л шокт орсон. “Юу гэсэн үг вэ, яагаад” гэж асуусан. Тэгсэн манай хүү
“Ээж ээ хоёулаа энийг дараа ярья. Одоо тэр унтсан байгаа. Би унтсан хойгуур нь цонхоор гараад зугтаачихсан. Тэнд дахиад нэг охин байгаа. Хэрвээ сэрэх юм бол тэр охиныг бас ална. Хоёулаа гялс цагдаа дуудаад очъё” гэсэн. Тэгээд л цагдаагийн хэлтэс рүү орсон. Тэнд бүрэлдэхүүн гаргах гэж нэлээн хугацаа орсон. Ингэж л тус этгээдийг барьсан.
Дараа нь би энэ хэргийн талаар мэдүүлэг авах үед сонссон. Миний хүү 23 цагт гэрээсээ гараад тэр айлд очсон байгаа юм. Тэр айлд очиход дөрвөн эмэгтэй, нэг эрэгтэй байсан.Тэр нэг эрэгтэй нь энэ хэрэг үйлдсэн этгээд. Ингээд тавуулаа сууж байж. Улмаар манай хүү тэнд байсан бүх хүнтэй танилцсан байна. Тэр үед амь хохирогч охиныг Ц.Дагвадоржийн найз охин бөгөөд удахгүй эхнэр нь болох хүн гэж танилцуулсан. Тэр үед бол бүгдээрээ ямар ч хэрүүл маргаан юу ч байхгүй. Сайхан инээж, хөхрөлдөөд тоглоод байж байсан. Ингээд тэр дунд байсан хоёр охин бүүр жоохон 15-16 насных гэмээр. Харахад л жоохон охин байсан. Тэр хоёрын нэг нь одоо миний хүүтэй цуг зураг дээр гараад байгаа охин. Нөгөө нь түүний найз охин. Улмаар зураг дээр гарч байгаа охины найз охин нь түрүүлээд явсан байна. Ингээд гурван охин, Ц.Дагвадорж, манай хүү гээд тавуулаа үлдчихсэн бөгөөд сүүлдээ нөгөө хоёр охин нэлээн согтчихсон юм байна. Энэ үед 15 настай охин такси дуудаж харина гэж. Харин манай хүү хүргэж өгөхөөр болсон байгаа юм. Тухайн үед найз нь машиных нь юм болохоо байчихлаа, чамайг очоод авъя гэсэн юм. Тэгээд “Би найзыгаа дуудчихсан учраас чамайг хүргээд өгье. Чи энэ харанхуй шөнө ийм согтуу таксигаар явж болохгүй” гэж хэлээд хүргэж өгөхөөр болсон байна. Нөгөө талийгаач охиныг ч мөн адил цуг хүргүүлэх үү гээд уул нь тэгье гэж ярьсан байгаа юм. Тэгээд найз нь ирчихлээ гэх үед нөгөө 15 настай охин нь гутал, хувцсаа өмсөөд хөл дээрээ тогтож чадахгүй байсан учраас түрүүлээд тэр охиныг гаргаад машинд суулгасан байгаа юм. Тэр хооронд нөгөө 16 настай охин гутлаа өмсөөд үлдсэн гэсэн. Улмаар тэр охиныг найзынхаа машинд суулгаж өгөөд ар гэрийнхэнтэй нь буюу эгчтэй нь ярьсан гэсэн. Хүү маань “Одоо Хан-Уул дүүргийн эндээс хөдлөх гэж байна. Гэрийн чинь доор очихоор та гарч ирээд тосоод аваач” гэж ярьсан гэсэн. Тэр охиноо орхичхоод нөгөө охиноо явах болов уу гээд буцаж орсон. Тэр орох хооронд бол нөгөө хэрэг хийсэн этгээд найз охинтойгоо хоёулаа байгаа шүү дээ. Орох үед хоёулаа гал тогооны өрөөнд орчихсон. Хаалга нь хаалттай байсан. Тэгээд нөгөө зураг дээр байгаа Э.Номин-Эрдэнэ гэх охин ганцаараа том өрөөнд сууж байж. Э.Номин-Эрдэнэ “Яах вэ, энэ хоёр муудалцаад ийшээ орчихлоо. Ална гээд орчихлоо” гэж хэлж. Харин манай хүү “Юун алах, юу гэж тийм юм байдаг юм бэ. Найз охин нь гэсэн биз дээ. Муудалцсан юм уу. Одоо эвлэрч байгаа байх аа” гээд ярилцаж байх үед цаанаас нь нөгөө хэрэг хийсэн этгээд хүүг минь дуудсан. “Нааш ир, хоёулаа тамхи татаадахъя” гээд ариун цэврийн өрөө рүү авч орсон. Тэр хооронд нөгөө талийгаач охин болон нөгөө зураг дээр байгаа хоёр охин гал тогооны өрөөнд үлдсэн байгаа юм. Тэгээд ариун цэврийн өрөө ороод хэсэг юм ярьсан байгаа юм. Хэрэг хийсэн этгээд “Би хүн алж чадна” зэрэг юм ярьсан бөгөөд хүү маань тайвшруулах гэж хичээсэн. Тэгээд ярилцаад сууж байтал манай хүү гэнэтхэн муужраад, унтаад сэрэх шиг болсон гэж байгаа байхгүй юу. Хүзүүн дээгүүр нь гараа тавьж сууж байсан. Тэгсэн хоолойг нь боогоод, унтаад сэрэх шиг болсон гээд байгаа юм. Тэгээд “Чи яаж байна аа” гэхэд “Энэ ямар мэдрэмж байна” гэж хэлсэн байна. Улмаар тэд ариун цэврийн өрөөнөөс гарах үед дахин хэрүүл, маргаан гарсан байна.
Нас барсан охиныг алгадаж, буйдан дээр унагаачихсан гэсэн. Тэр үед миний хүү салгах, болиулах гээд нэлээн оролдсон. Тэгээд хоёр ч удаа түлхээд унагаачихсан байгаа юм. Хөл нүцгэн байсан учраас бас халтирах юм байсан гэж өөрөө тэгж хэлсэн. Тэгээд хүү маань халтирч унахтай зэрэгцэн уртасгагч аваад охины хоолойг боочихсон байна. Хүү минь болиулах гэж маш их хичээсэн гэсэн. Харин тэр этгээд миний хүүг “Тэр дотор буу бий. Аваад энийг бууд” гэж хэлсэн байна. Цаашлаад нөгөө охинд мөн адил “Энэ залууг бууд” гэж хэлж. Нөгөө охин мэдээж айсан байгаа шүү дээ. Буланд айгаад зогсоод байсан гэсэн. Тэгээд тэр хайрцгийг онгойлгох гэхэд нь онгойлгуулахгүй гээд гэх хориглох хооронд нөгөө этгээд ширээн дээрээс хутга аваад манай хүү рүү савчиж эхэлсэн байгаа юм. Ингээд тэр хүн хутгатай, буутай ойртвол ална гээд л. Тэр зэвсэг барьсан хүний өөдөөс манай хүү яаж ч чадахгүй, ойртож чадахгүй байсан.
Одоо 21 настай хүүхэд байтугай 40-50 настай бид нар хүртэл ийм байдалд орох юм бол шокт орно. Яахаа мэдэхгүй, айна. Тийм янз бүрийн зэвсэгтэй хүний өөдөөс хөдөлж ч чадахгүй. Тэгээд маш их айгаад сүүлдээ ойртож чадахгүй болохоороо сөгдөөд гуйсан байгаа юм. Сөгдөж гуйж байх хугацаанд ингээд мөргүүлээд, чи тэгвэл тэд мөргө гээд л. Энэ хооронд нөгөө охин бол өөд болсон нь харамсалтай. Тэгээд охиныг өнгөрсний дараа хэрэг хийсэн этгээд “Би олон хүн алсан. Би та нарыг алах бол энүүхэнд. Аль эртнээс ар гэрийг чинь судалчихсан. Одоо та хоёр миний эсрэг ямар нэг үйлдэл хийх юм бол ар гэр лүү чинь би хүн явуулна. Хүлээгээд байж байгаа” гэх мэтээр янз бүрийн байдлаар дарамталж бичлэг хийсэн.
Жижигхэн аппарат гаргаж ирээд “Би Японы якуза бүлгэмд байдаг. Надад олон ах нар байгаа. Би хиймэл дагуулаар шууд дамжуулж та хоёрыг харуулна” гэх мэтээр ярьж эхэлсэн. Үнэхээр цаанаа хүнтэй яг харьцаж байгаа юм шиг харьцаад л, нөгөө хоёрыг дарамтлаад л. Улмаар тэр хоёр хүүхдээр цогцсыг чемоданд хийлгүүлж байгаа шүү дээ. “Би 10 тоолно. Чемоданд хөл, гарыг нь тастаад ч хамаагүй багтаа” гэсэн байна. Тэгэхээр нөгөө хоёр хүүхэд айж, сандраад л тэр чемоданд ямар ч байсан багтаагаад л хийсэн байгаа юм. Чемоданд хийлгүүлээд нөгөө хоёрыг “Одоо та хоёр энд унтана. Чи наад буйдан дээрээ унт. Маргааш гурвуулаа энийг хээр аваачиж булна, шороонд булна” гэж хэлсэн байна.
Улмаар нөгөө охинтой өөр өрөөнд орсон байгаа юм. Харин нөгөө охин нөгөөдөх чинь унтчихлаа гээд ороод ирсэн. Дарамталж байх хоорондоо бүх утаснуудыг нь хураасан бөгөөд энэ үед тэд утас, камераа нууцаар авсан гэсэн. Ингээд хүү минь цагдаа дуудахаар тагтаар зугтаасан. Хаалгаар гаръя гэхээр хаалганых нь батарейг нь авчихсан байгаа юм. Хоёрдугаарт, хаалга онгойхоор аймаар дохио дуугардаг. Тэгэхээр сэрчихнэ шүү дээ. Тэгээд л цагдаа дуудахаар явсан. Ингэж зугтаах явцдаа над руу залгасан байгаа юм. Тэгээд энэ хэрэгтнийг баривчлуулсан. Ингэж тэр охиныг аврах гэж чадлаараа тэмцсэн. Эцэст нь зэвсэг барьсан хүний өөдөөс яаж ч чадахгүй байдалд ороод сүүлдээ гуйгаад дийлээгүй. Гэхдээ хүү маань энэ аймшигт этгээдийг баривчлуулсан. Хэрэв ингэж гарч зугтаагаад цагдаад очиж мэдэгдээгүй байсан бол энэ хүн дараа нь энэ хоёр хүүхдийг ч амьд үлдээхгүй шүү дээ. Би хүн алдаг, гэрч үлдээдэггүй зэргээр дарамталж байх хугацаандаа тэгж хэлсэн байгаа юм. Мөн энэ хүн маргааш нь Япон явна гэж байсан хүн. Япон явчихсан бол хэрэг яах байсан бол.
-Тэгэхээр болсон процесс бол энэ юм байна. Хохирогчоор эхлээд татагдсан байж байгаад яагаад яллагдагч болчхов. Энэ тухайд та юу хэлэх вэ?
-Бүтэн жил гаран хохирогч гэж тогтоогдсон байсан хүүхдийг сошиалаар цацсан зураг, мэдээлэл гарснаас болж, шүүх нэг өдрийн дотор миний хүүг яллагдагч болгосон. Ер нь хоёр удаагийн урьдчилсан шатын хэлэлцүүлэг, нэг удаагийн давж заалдах шатны хэлэлцүүлэг болсон. Улмаар энэ хүүхдүүд хохирогч мөн үү, биш үү гэдэг дээр нэмэлт мөрдөн байцаалт хийгээд тогтоогоод ахиад оруулж ир гэдэг захирамж гарган буцаасан. Гэтэл ямар ч нэмэлт мөрдөн байцаалт хийгдээгүй. Ямар ч нэмэлт мөрдөн байцаалт хийгдээгүй байж 2025.10.23-ны өдөр орой 18 цагийн үед намайг дуудаж, танилцуулсан. Улмаар маргааш буюу 2025.10.24-ний өглөө манай хүү, ээжийг дуудаж уулзсан. Ээжтэй түрүүлж уулзсан байгаа юм. Ээжтэй түрүүлж уулзаад араас нь хүүг минь өмгөөлөгчтэй нь оруулсан.
Ингээд яллагдагч болгосон. Одоо энэ санал дээр гарын үсэг зурж, танилц гэж өгсөн. Ямар ч нэмэлт мөрдөн шалгах ажиллагаа хийлгүй шууд яллагдагч болгосон. Тэр өдрөө орой нь 19 цагаас таслан сэргийлэх арга хэмжээний хуралтай гэж хэлсэн. 18 цагт танилцуулаад 19 цагаас хуралтай шүү гэж хэлсэн. Тэр өдрөө хурлаа хийгээд тэр өдрөө 30 хоногоор баривчилсан. Тэгээд баривчилсан шалтгаан нь олон нийтийн энэ сошиалаар явж байгаа комментуудаас болоод бусдын заналхийлэлд өртөхөөс сэргийлж, өөрийнхөө амь насыг хохироохоос сэргийлж байна гэдэг л үндэслэл хэлсэн.
Тэгээд 30 хоног хорьсон. Сая 2025.11.24-нд 30 хоногийн хугацаа дуусах байсан. Гэтэл 2025.11.20-ны өдөр хялбар ажиллагааны шүүх дээр энэ асуудлыг хэлэлцээд энэ хүүхдүүдэд хугацааг сунгах үндэслэл байхгүй гэж суллах шийдвэр гарсан байсан. Мөн 2025.11.24-ний өдөр прокуророос ахиад шүүгчийн захирамжид эсэргүүцэл өгчихсөн байсан. Тэгээд 2025.11.24-ний өдөр давж заалдах шатны хурал болоод энэ хүүхдүүдийн хорих хугацааг дахиад нэг сараар сунгачихлаа. Бүтэн жил гаран энэ хүмүүст мөрдөн байцаагч гээд ганц хүн ажиллаагүй. Энд гурван дүүргийн баг томилоод ажиллуулсан. Энэ баг нь бүтэн жил гаран ажиллаад хүүхдүүд гэм буруугүй, хохирогч гээд тогтоочихсон байсан. Прокурор нь хүртэл шүүх хуралд орон ортлоо энэ хүүхдүүд хохирогч мөн гэдгийг дүгнээд, хянаад, мөн гэдэг дээр баттай байр суурьтай орж байсан. Гэтэл сошиалаар гурван удаагийн зураг цацсан. Тэгээд олон нийтийг бол аймар босгосон. Олон нийтийн сошиалын орчихсон.
Ингээд сошиалаас болж, сошиалаас айгаад ч юм уу эсвэл дээгүүрээ энэ сошиалын амыг таглая ч гэдэг юм уу тийм байдлаар гэмгүй хүүхдүүдийг хохироож, гэмтэн болгосон гэж би хардаж байна.
Ямар ч баримт нотолгоогүй, ямар ч мөрдөн шалгалт хийхгүйгээр яллагдагч болгон өөрчлөөд оруулчхаж байна. Энэ дээр бүх хүн л хардаж байгаа. Би эхлээд шүүхэд маш их итгэж байсан. Яг ийм үйлдэл хийчихсэнд би үнэхээр гайхаж байгаа.
-Олон нийтийн сүлжээгээр цацагдсан зургуудын хувьд та юу хэлэх вэ?
-Тэр бол нийтдээ хоёр тасалсан 10 гаруй минутын бичлэг байх шиг байгаа юм. Тэр бичлэгээс хэргийн материалд зураг хэлбэрээр тастаад оруулчихсан. Тийм л зураг. Бичлэг чинь өөрөө үйлдэл хийж байгаа хөдөлгөөнтэй шүү дээ. Тэндээс таслахад хүний хөдөлгөөн чинь секунд байтугай хэмжигдэж байгаа зүйл шүү дээ. Тэрийг таслахад ямар ч хэлбэрээр хүний дүрс буугдах байх л даа. Ер нь бол бичлэгээс л буулгачихсан зураг.
"НӨХӨР БИД ХОЁР ЮУ, ЮУ Ч ҮГҮЙ АМЬДРАЛААС ЭХЭЛСЭН ЭГЭЛ ГЭР БҮЛ"
-Олон нийтийн сүлжээ, олон нийтийн дунд одоо таны гэр бүлийг эрх мэдэлтэй, өв хөрөнгөтэй гэр бүл. Магадгүй шүүх, хуулийн байгууллагуудад нөлөөлж байна гэдэг хардлага байгаа. Танай гэр бүл үнэхээр тийм өв хөрөнгөтэй, эрх мэдэлтэй айл юм уу?
-Энэ талаар би онцолж хэлэхийг хүсэж байсан. Олон нийт үүнийг үнэн зөвөөр ойлгоосой гэдгийг бас хүсэж байсан. Бидний амьдрал бол ерөөсөө байдаг л эгэл жирийн айл. Ард иргэд, ажил хийгээд цалингаас цалингийн хооронд амьдарч байгаа олон өрх бий. Бид тийм л гэр бүл. Би оюутан байхаасаа л ажил хийж ирсэн. Анх нөхөртэйгөө суугаад хоёулаа юу, юу ч үгүй амьдралаа босгож байсан. Манай нөхрийн хувьд 4-5 дугаар ангиасаа “Гэсэр” сүмд шавилан сууж, буян номыг хурж, бусдын төлөө сайн сайхныг хийж явж ирсэн хүн. Тэгээд хоёулаа манай ээж, аав хоёрын дэргэд амьдардаг байлаа. Мөн би хөрөнгөтэйдөө хүүгээ хувийн сургуульд сургаагүй. Бид хоёрын гол зорилго бол хүүдээ мөнгө төгрөг хураах бус боловсрол олгох байсан. Японд л сургуульд сургах мөрөөдөлтэй байлаа. Улмаар хүүгээ долдугаар ангиас нь “Шинэ Монгол” сургуульд сургасан. Тэр үед чинь “Шинэ Монгол” сургууль долдугаар ангиас нь элсэлт авдаг байсан юм. Тэгээд шалгалт өгүүлээд тэнцээд долдугаар ангиасаа эхлүүлээд “Шинэ Монгол” сургуульд сурсан.
Тэгээд хүү маань арван хоёрдугаар ангиа төгсөөд сургуулиасаа “Шинэ Монгол” технологийн дээд сургуульд сурах тэтгэлэг авсан. Тэр сургуульдаа ч элсэн орсон. Хүү маань бага байхаасаа л хичээл номдоо дуртай. Ерөөсөө миний хүү хичээлээ хийгээч ээ гэж хэлүүлж үзээгүй. Анги хамт, олон багш нарынхаа хайр хүндэтгэлийг хүлээсэн хүү байсан.
Тэгээд арван хоёрдугаар ангиа төгсөөд Японы тэтгэлэгт бэлдэж байх үед буюу яг шалгалттай нь давхцаад манай нөхөр өвчний улмаас өөд болсон. Энэ бол бидний амьдралд маш том цохилт болсон. Хүн хүнээ алдана гэдэг хамгийн уй гашуутай, хамгийн аймшигтай, харамсалтай зүйл. Тийм ч учраас би энэ охины ээжийг үнэхээр өрөвдөж, хүндэтгэж байсан. Улмаар хүү маань Япон явах мөрөөдлөө түр орхиж бид хамтдаа хөдөлмөрлөсөн. Би ч ажлаа хийж, цалингаас цалингийн хооронд хоёр хүүхдээ хоосон хонуулчихгүй байх юм сан, хүний доор оруулчихгүй байх юм сан гээд амрах, өвдөх эрхгүйгээр ажил хийж өдийг хүрсэн. Миний хүү бол их сайн хүү. Үнэхээр сайн хүү ухаантай. Би гуравхан жил ажил хийгээд хоёулаа амьдралаа сайхан цэгцэлчхээд эргээд сурна гэдэг байлаа.
-Ярилцлага өндөрлөж байна. Та эцэст нь юуг хэлэхийг хүсэж байна?
-Бид энэ хэргийг анхнаасаа үнэн юм үнэн бодитоороо шийдэгдэх байх гэдэгт аймар итгэж байсан. Мөн энэ мөрдөгч прокурорууддаа мөн итгэж байлаа. Хэчнээн ингээд сошиалаар янз бүрийн худал, гүтгэлэг, дарамт, доромжлол явж байсан би маш их тэвчсэн. Мөн охины ээжийг бас хүндэтгэж байсан. Эргүүлээд мэдэгдэл зэрэг янз бүрийн зүйл хийе гэж огт бодож байгаагүй. Монгол улс бас хуультай орон, үнэнээр шийдэгдэнэ гэж итгэсэн ч итгэл алдарлаа. Сошиалаас болж нэг л өдрийн дотор миний хүүг хохирогч байсныг яллагдагч болгосон. Тэгээд дээр нь “эс үйлдэхүйгээр” яллагдагч гэсэн. Эс үйлдэхүйгээр гэдэг нь гэмт хэрэг үйлдэж байхад ямар ч үйлдэл хийхгүйгээр хараад зогсож байсан гэнэ. Одоо надад бол ер нь цагдаа, прокурорт бол итгэх итгэл үнэхээр байхгүй боллоо. Харин шүүх дээр өмгөөлөгч, шүүгч нар үнэн бас шударга ажиллаасай гэж итгэж байгаа.
-Ярилцсанд баярлалаа.
