"Тавантолгой"-н ордод үйл ажиллагаа явуулдаг Бортээгийн уурхайн ашиглах эрхийг эзэмшдэг “Админерал” ХХК-ийн гүйцэтгэх захирал, БНХАУ-ын иргэн Н.Хасбаатар нь өнгөрсөн хоёрдугаар сарын 12-ны /2025.02.12/ өдөр Өмнөговь аймгийн Цогтцэций суманд байрлах уурхайн кемп дээрээ учир битүүлгээр нас барсан хэрэг гарсан билээ.
Энэ талаарх мэдээллийг Өмнөговь аймгийн цагдаагийн газрын Цогтцэций сумын сум дундын цагдаагийн хэлтэс авч, улмаар мөрдөн шалгах ажиллагааг явуулж, тухайн иргэн нь "Эрүүл мэндийн шалтгаанаар нас барсан" болох нь тогтоогдсон хэмээн үзэж, хэргийг хаасан байдаг.
Тэгвэл өдгөө “Админерал” ХХК-ийн гүйцэтгэх захирал, БНХАУ-ын иргэн Н.Хасбаатарын учир битүүлгээр гэнэт нас барсан хэргийг хуулийн байгууллагаас сэргээн шалгаж эхэлсэн байна.
Тодруулбал, Цагдаагийн ерөнхий газрын Онц хүнд гэмт хэрэгтэй тэмцэх хэлтсээс БНХАУ-ын иргэн Н.Хасбаатарын ажлын байр дээрээ гэнэт нас барсан хэргийг сэргээн шалгаж эхлээд байгаа аж. Хууль зүйн сайд Б.Энхбаяр өмнө нь уг хэргийн талаар "Ц.Чулуунзагдын төрсөн ах Ц.Ламжав, Ц.Чулуунзагдын эхнэр, "Админерал" ХХК-ийн санхүүгийн дарга нар 30 сая долларыг бэлнээр хүлээж авсан. Энэ авлигын хэргийн гол амьд гэрч нь Н.Хасбаатар байсан. Би бол энэ хүнийг алсан гэж боддог" хэмээн байр сууриа илэрхийлж байсан юм.
Ямартай ч “Админерал” ХХК-ийн удирдлага болоод холбоотой гэгдэх нэр бүхий хүмүүсийг цагдан хорьж, мөрдөн шалгаж байгаа энэ үед тус компанийн гүйцэтгэх захирал асан, БНХАУ-ын иргэн Н.Хасбаатарын учир битүүлгээр гэнэт нас барсан хэргийг цагдаагийн байгууллагаас сэргээн шалгаж байгаа аж.
