Монголын гурван иргэн Буриадаас хатаасан жимс нутаг руугаа хууль бусаар авч явахыг завджээ. Тээшнээс нь хатаасан чангаанз, чавга, банана олдсон байна. Бүтээгдэхүүний нийт жин нь 250 кг байсан гэж "Восток-Телеинформ" Беларусь улсын Россельхознадзорын албанаас мэдээллээ.
Энэхүү зөрчлийг Россельхознадзорын газрын улсын байцаагч Буриадын гаалийн газрын мэргэжилтнүүдтэй хамтран хорио цээрийн ургамал эрүүл ахуйн хяналт шалгалтын үеэр Хиагт олон улсын шалган нэвтрүүлэх боомтод илрүүлжээ. Хяналт шалгалтын явцад ОХУ-ын нутаг дэвсгэрээс бүтээгдэхүүн экспортлохдоо ургамлын хорио цээрийн дүрэм, журам зөрчсөнийг илрүүлсэн байна.
“Экспортолсон бүтээгдэхүүнд ургамлын эрүүл ахуйн гэрчилгээ байхгүй байсан нь “Ургамлын хорио цээрийн тухай” холбооны хуулийг зөрчиж, хорио цээртэй организм тархах аюулыг бий болгож байна” гэж тус газраас тайлбарлав.
Одоогийн байдлаар ОХУ-ын Захиргааны зөрчлийн тухай хуулийн 10 дугаар зүйлийн 10.2-т заасны дагуу зөрчил гаргагчдын эсрэг гурван протокол үйлдэж, зохицуулалтад хамрагдсан бүтээгдэхүүнийг ургамлын эрүүл ахуйн гэрчилгээ олгохоор ОХУ-д буцаажээ. Эргэн сануулахад, өмнө нь Монголын жуулчид Буриадаас 15 кг гаруй хаш чулуу гаргах гэж байгаад баригдсан байдаг. Энэ хэрэг Хиагт шалган нэвтрүүлэх боомтод гарсан бөгөөд зөрчил гаргасан хоёр этгээд хувийн машинаараа ОХУ-ын хилээр нэвтрэхийг завджээ.
