Нөхөр Н.Лүндэндорж, дүү Ж.Содбилэг нартаа давуу байдал олгож, 3.3 тэрбум төгрөгийн асуудалд холбогдсон хэргээр ажлаасаа чөлөөлөгдсөн гэгддэг Монгол, Оросын хамтарсан III сургуулийн захирал асан Ж.Соронзон нь ажилдаа буцаж томилогдохын тулд Боловсрол, шинжлэх ухааны сайд Л.Энх-Амгалантай нэг хэсэг шүүхдэлцсэн ч эцэстээ тэрбээр ялагдал хүлээсэн билээ.
Тэгвэл Ж.Соронзон нь дахин шүүхэд ханджээ. Тодруулбал, түүнийг Монгол, Оросын хамтарсан III сургуулийн захирлын албан тушаалаас чөлөөлсний дараа тус албан тушаалд түр томилогдсон Б.Болор нь Ж.Соронзонг Монгол, Оросын хамтарсан III сургуулийн Захиргаа, аж ахуйн хэлтсийн менежерээр томилсон байдаг. Харин тэрбээр өнгөрсөн оны дөрөвдүгээр сарын 17-ны /2024.04.17/ өдөр Ж.Соронзонг уг албан тушаалаас чөлөөлсөн аж.
Гэтэл Ж.Соронзон нь тухайн албан тушаалдаа буцаж томилогдохын тулд Монгол, Оросын хамтарсан III сургуулийг хариуцагчаар татан Баянзүрх, Сүхбаатар, Чингэлтэй дүүргийн Иргэний хэргийн анхан шатны тойргийн шүүхэд нэхэмжлэл гаргасан байна.
Тухайн хэргийг шүүх хурал өмнө нь хэд хэдэн удаа товлогдсон ч өнөөг хүртэл шийдэгдээгүй байгаа аж. Учир нь Ж.Соронзон нь гадаадад байгаа гэх шалтгаанаар шүүх хурлыг хойшлуулах хүсэлт гаргаж, энэ дагуу шүүх хурал хойшилж байжээ. Харин өнгөрсөн гуравдугаар сарын 27-ны /2025.03.27/ өдөр товлогдсон шүүх хуралд тэрбээр мөн ирээгүй бөгөөд итгэмжлэгдсэн төлөөлөгч нь нэхэмжлэгч Ж.Соронзонг шүүх хуралд өөрийн биеэр оролцуулах хүсэлт гаргаж, энэ дагуу шүүх хурлыг тавдугаар сарын 19-ний өдөр хүртэл хойшлуулсан байна. Бид уг хэргийн талаар эргэн мэдээлэх болно.
